بۆ چارەسەرکرنا ئاریشەیان ل گەل شامێ رێککەفتینە
فەرماندارێ گشتی یێ هێزێن سووریا دیموکرات دیار کر ئەو ل سەر ئالیەتەکێ ل گەل شامێ بۆ چارەسەکرنا پرسێن هەی رێککەفتینە و روودانێن چەند رۆژێن بۆری ل دەڤەرێن کوردی ژی سەلماند کو کورد ل سووریێ دەست ژ مافێن خوە بەرنادەن.
مەزلوم عەبدی فەرماندارێ گشتی یێ هێزێن سووریا دیموکرات دیار کر، د ئاستێ جیهانێ دا ب گشتی پشتەڤانیەکا باش بۆ سووریا نوو هەیە، ئەمریکا و وەلاتێن ئێکەتیا ئۆرۆپا ژی پشتەڤانیێ ل مافێن رەوا یێن گەلێ کورد ل سووریێ دکەن، ل گەل شامێ ژی رێککەفتن هاتیە کرن، کورد قەبوول ناکەن کو ل سووریێ بێی ماف بژین و بەرپرسێن نها یێن سووریێ ژی باش دزانن هەکە ئالۆزی دروست ببن ئەو ژی نەشێن ب ئارامی ل سووریێ بژین، ئانکۆ گرنگە کورد بگەهنە هەموو مافێن خوە ل سووریێ و گۆت: (هەتا نها مە سێ رێککەفتن ل گەل شامێ کرینە و ل سەر ئالیەتەکێ ژی ژ بۆ چارەسەرکرنا پرسێن هەی رێککەفتن هاتیە کرن، هندەک خالێن رێککەفتن هەتا نها هاتینە بجهئینان و ڤان رۆژێن دووماهیێ هندەک روودانێن نەخوەش ل دەڤەرێن کوردی روو دان کو ب چو رەنگەکێ ژی ناهێنە قەبوول کرن).
ناڤهاتی دیار کر، بابەتێ زمانێ کوردی بۆ گەلێ کورد ل سووریێ هێلا سۆرە، ل گۆر رێککەفتنا کو ل گەل شامێ هاتیە کرن دڤێت ل دەڤەرێن کوردی زمانێ کوردی ببیتە زمانێ فەرمی یێ پەروەردێ، مخابن ئەوا ل حەسەکێ و پاشی ژی ل کۆبانێ روو دا تشتەک نەخوەش بوو، مە داخواز ژ شامێ کریە کو ل گۆر خالێن رێککەفتنێ کار بکەن و نابیت ب چو رەنگەکێ زۆرداری ل کوردان بهێتە کرن، گەلێ کورد ئێدی ل سووریێ زۆرداریێ قەبوول ناکەت و دڤێت کورد ژی وەکو عەرەبان خوەدانێ هەمان ماف بن و گۆت: (ئەم بەحسێ سووریایەک نوو دکەین، دڤێت کورد د سووریا نوو دا شریک بن، ئانکو وەکو عەرەبان خوەدان هەموو مافێن خوە یێن سیاسی، ئابووری و جڤاکی بن و دڤێت کورد د رێڤەبرنا سووریا نوو دا خوەدان رۆل بن، بەرپرسێن شامێ ژی ئەو یەک قەبوول کرینە و گرنگە رێککەفتن وەکو خوە بهێتە بجهئینان).
فەرماندارێ گشتی یێ هێزێن سووریا دیموکرات د دووماهیا ئاخڤتنا خوە دا ئاماژە ب ڤێ یەکێ ژی کر کو ل گۆر رێککەفتنا ل گەل شامێ دڤێت کورد د هەموو سازیێن دەولەتێ دا جه بگرن و هەروەسا ئەو ب هەموو رەنگەکێ کار دکەن دا کورد دەڤەرێن خوە برێڤە ببەن و نها دەست ب خەباتەکا گەلەک باش بۆ ئێکەتیا هێزێن کوردی ل سووریێ هاتیە کرن، چونکی دەمێ کورد ئێکگرتی بن دێ گەهنە هەموو مافێن خوە.
