بۆ ڤەمراندنا ئاگری ئەم پێدڤی ب دابینكرنا كەرەستە و ئامیرەیێن مۆدرێنین
سندس سالح سلێڤانەیی:
ب مەرەما كێمكرما روودانێن ئاگری و نەهێلانا بەرفرەهبوونا وان، رێڤەبەریا دارستان و پاوانان ل دهۆكێ دەست ب هندەك پێنگاڤێن رێگریكرنێ كریە، كو ئەو ژی پاقژكرن و ڤەكرنا هندەك رێكێن نوو یە ل ناڤ دارستانێن سنۆرێ پارێزگەها دهۆكێ، هەروەسا چێكرنا هندەك جهانە كو دبێژنێ (ئاگربڕ) جۆتیار و خەلكێ دەڤەرێ ژی ڤێ پێنگاڤێ ب باشی دبینن و دخوازن زێدەتر هشیاری دناڤ خەلكی و گەشتیاران دا بهێتە بەربەلاڤكرن.
كاوە سەبری، رێڤەبەرێ رێڤەبەریا دارستان و پاوانان ل دهۆكێ دبێژیت: دگەل هاتنا وەرزێ هاڤینێ كو سالانە د ڤی وەرزی دا روودانێن ئاگربەربوونێ زۆر دبن، ب تایبەت ل ناڤ دارستانان، لەورا ب فەرمانا پارێزگەها دهۆكێ مە دەست ب هندەك پێرابوونان كریە كو هەكە هاتوو خودێ نەكەت ئەڤ سالە ئاگر بەربوو دارستانەكێ دا زوو بهێتە كنترۆلكرن و نەهێلن بەرفرەهتر لێ بهێت دا زیان د مەزن نەبن.
رێڤەبەرێ رێڤەبەریا دارستان و پاوانان، زێدەتر گۆت: نوكە تیمێن مە یێ ل ناحیا زاویتە و سیارەتیكا و ئەتریش كاردكەن، ب درێژاهیا (17) كیلۆمەتران دارستان و رێك دێ هێنە پاقژكرن و ل هندەك جهان دێ رێكێن نوو هێنە ڤەكرن و ل هندەك جهان ژی دێ (ئاگربڕان) چێكەن و ئەڤە هەموو ژبۆ هندێ نە دا كو روودانێن ئاگربەربوونێ دناڤ دارستان و پاوانان دا بهێنە كرن و هەكە ب هندەك هەبوون ژی دا زوو بهێنە كونترۆل كرن دا زێدەتر بەرفرەه نەبن.
حامد عەزیز، وەك جۆتیار و هاولاتیەكێ دەڤەرێ دبێژیت: ئەڤ كارێ نوكە ژلایێ رێڤەبەریا دارستان و پاوان دهێتە كرن جهێ دەستخۆشیێ یە، هەروەسا ئەڤە نیشانا وێ چەندێ یە كو حكومەتا هەرێما كوردستانێ ل دووڤ بەرنامەیەكێ دارژتی گرنگیێ ب دارستان و پاوانان ددەن ب مەرەما پاقژ راگرتنا ژینگەهێ.
