بێهنۆشكه‌كا نڤیسینێ دگه‌ل كۆمه‌له چیرۆكا ب ناڤێ (زێمارا دلی)*
عبدالرحمن بامه‌رنی
ئه‌ز ناڤه‌شێرم، كو ئێك ژوان چیرۆكنڤیسێن ل ده‌ڤه‌را مه و هه‌ر گاڤا چیرۆكه‌كا وان ب به‌رچاڤێن من بكه‌ڤیت، ئه‌ز خواندنا وێ ژخوه ناكه‌م و ئه‌ز دخوینم، خواندنه‌ك نه دگه‌ل دووماهی هاتنا وێ پشت بده‌مێ. من گوت ئه‌ز، ژبه‌ركو چیرۆكێ و هه‌ر تێكستێ نڤیسه‌ر سنعه‌تكاریێ تێدا بكه‌ت، ئه‌و تێكست من رادكێشیته خوه، دناڤ تێكستێ ژی دا هند ناڤه‌رۆك و روودان بۆ من گرنگ نینه، هندی یاریپێكرنێن نڤیسه‌ری، ئایا تا چه‌ند یێ سه‌ركه‌فتی بوویه و تا چه‌ند شیایه منه‌كێ خوانده‌ڤا، ببه‌ته ناڤ كووراتیا تێكستێ خوه دا.
ئاخر تێكست ژی هه‌ر هۆسانه، ئه‌و نڤیسه‌رێ نه‌شیا بۆ چه‌ند ڕۆژان، خوانده‌ڤایی دناڤ قولاچێن تێكستێ خوه دا بگێرینیت و جیهانا خوه نیشان بده‌ت، هینگێ كه‌نگی ئه‌و تێكسته‌كێ ئه‌ده‌بیه.؟!
ئه‌و نڤیسه‌رێ من ژێ به‌حس كری، كیه؟ گرنگ نینه من به‌حسا كاك (ئه‌مجه‌د)ی وه‌ك خودانێ ڤێ په‌رتووكێ بیت، هه‌ر چه‌نده ئه‌و ئێك ژوان چیرۆكنڤیسێن كێمه ل ده‌ڤه‌را مه، كو ئه‌ز ب قه‌له‌مێ وان داخبار، تایبه‌ت د بوارێ چیرۆك نڤیسینێ دا و پرانیا جاران ژی ده‌ما ئه‌ز چیرۆكه‌كا وی دخوینم، ئه‌ز په‌یوه‌ندیێ بۆ دكه‌م و ب تنێ ده‌ست خۆشیێ لێ ناكه‌م، ژبه‌ركو په‌یڤا ده‌ستخۆشیێ ب خوه دكه‌ڤیته سه‌ر لێڤان، لێ ئه‌م دان و ستاندنێ دكه‌ین و دان و ستاندنا مه ناچیته د قالیێ كی بلند و كی كولند یان ئێك و دوو بكه‌ینه د قه‌فه‌سا تاوانێ دا، به‌لكو پرۆسا نڤیسینێ ب خوه هۆسانه، نڤیسین تا درست و ته‌ندروست بگه‌هیته به‌ر ده‌ستێ خوانده‌ڤانی، دڤێت د چه‌ند قۆناغان را ده‌رباس ببیت و ژوان قۆناغان ژی، ره‌خنه گرتن و ره‌خنه وه‌رگرتنه.
ئاخر چیرۆكنڤیسی ژی هه‌مان تاس و هه‌مان مه‌به‌سته و گه‌له‌ك جاران پێشگۆتنا كۆمه‌له چیرۆكه‌كێ، تێرا هه‌یه خوانده‌ڤانی دو جاران راكێشیته خواندنا چیرۆكێن تێدا هاتینه بلاڤكرن، جاره‌كێ چیرۆك نڤیس ب خوه و جارا دی ژی كا ئه‌وێ پێشگۆتن نڤیسی، چه‌ند شیایه رێخۆشكرنێ بۆ ڤێ جیهانا هاتیه ئافراندن بكه‌ت.
من ئافراندن ئینا سه‌ر زمان، ئها من مه‌به‌ست پێ ئه‌ڤ خاله‌یه بگه‌همێ، ئه‌ز وه‌سفه‌كێ بده‌مه ڤێ په‌رتووكێ و جوانیه‌كێ ل سه‌ر جوانیا تێكستێن وی زێده بكه‌م، هه‌ر چنه بیت ژ نڤیسینێن من یێن ره‌خنه‌یی و سه‌رراڤكرنا تشتێن جوان، جوان مه‌به‌ستا من زیندی، كو هه‌ر ده‌م د نڤیسینێن خوه یێن ره‌خنه‌یی دا، ل تێكستێن نڤیسه‌رێن دی ئه‌ز ل زیندیبوونێ دگه‌رم و دڤێت خوانده‌ڤا هه‌ست ب ڤێ زیندیبوونێ بكه‌ت، ژبه‌ركو چیرۆكنڤیس ژی خوداوه‌نده‌كه و ئالاڤێن وی په‌یڤن و ژ په‌یڤان تشته‌كی د ئافرینیت، كو ئه‌و تشت دگه‌ل مرۆڤی باخڤیت.
ئاخر ئه‌گه‌ر به‌شه‌كێ ئافراندنێ ل نك نڤیسه‌ری و خودانێ تێكستی نه‌بیت، دێ چاوا شێت لڤینه‌كێ ده‌ته تشته‌كێ ئه‌ز ل سه‌ر راهاتیم و بۆ من كه‌ته تشته‌كی زیندی، من زیندیبوون دڤێت و نڤیسینا پێشگوتنا من ژی هه‌مان سه‌راڤكرنه، كو ته‌یه‌كێ خوانده‌ڤا راكێشمه خواندنا وێ زیندبوونا من دڤان چیرۆكان دا دیتی.
ــــــــــــــــــــ
ـ زێمارا دلی، كورته چیرۆك، د. ئه‌مجه‌د عوبه‌ید، 2022 دهوك.
