بێهەلوەستی و خوەڤەدزینا بەغدا ژ سزادانا میلیشیایێن درۆنهاڤێژ، دێ ژناڤچوونا ئابووری و ئەمنی بۆ وەلاتی ئینیت
رۆژنامەیا (زە ناشنال) یا ئیماراتی د راپۆرتەكا شیكاری دا، ئاماژێ ب وێ چەندێ دكەت كو ئەو سیاسەتا حوكمەتا بەغدا د سەرەدەریێ دا ل گەل ئاستەنگێن ناڤخوەیی و دەڤەری پەیڕەو دكر، ئێدی چو مفایەك نەمایە و گەهشتییە بنبەستەكێ.
رۆژنامەیا ناڤبری ئاماژێ ب وێ چەندێ دكەت، ئەو سالێن كو ئیراقێ تێدا مفایا خوە ژ ئارامی و گەشەیا ئابووری ددیت، نوكە هەموو كەفتینە بن گەفەكا جدی، ئەو ژی ژبەر لێكەفتێن سیاسی یێن وی شەڕێ ئەمریكا و ئیسرائیلێ دژی ئێرانێ دەستپێكری، بێدەستهەلاتییا بەغدا د وەرگرتنا هەلوەستەكێ توند دا، وەسا لێ دكەت د پاشەڕۆژێ دا ببیتە نێچیرەكا ب سانەهی و وەلات بزڤڕیت بۆ سەردەمێ قەیرانێن توند.
د پشكەكا دی یا راپۆرتێ دا هاتییە، دەستوورێ ئیراقێ یێ پشتی 2003ێ رێ ب هندەك ئاییان دایە رۆلەكێ مەزن د سیاسەتێ دا بگێرن، ب تایبەت ئەو گرووپ و میلیشێیێن هەڤپەیمانێن ئێرانێ نە و نوكە كونترۆلەكا بێوێنە ل سەر ئابووری هەیە و ب جۆرەكی كار دكەن كو ژ روویێ دارایی ڤە تمامێ سەربەخوە نە ژ دەولەتێ. هەر چەندە حوكمەتان هەر دەم هەول دایە خوە ژ پێكدادانێ ل گەل وان دوور بگرن، بەلێ ڤێ چەندێ ئیراق كرییە تاكە وەلات د دەڤەری دا كو ژ هەموو ئالییەكی ڤە گورزێن راستەوخوە بەردكەڤن.
رۆژنامەیێ باس ل وێ چەندێ ژی كرییە، كو واشنتۆن ئێدی بێدەنگییا بەغدا بەرانبەر میلیشێیان قەبیل ناكەت و هەر هەلوەستەكێ «خوەدزینەڤە» وەك پشتەڤانی بۆ ئێرانێ ل قەلەم ددەت. وەك پێشبینی ژی هاتییە كرن ب گۆرەی چەندین میدیایێن ئەمریكی و عەرەبی، د ڤان ڕۆژان دا ئەمریكا هنارتنا دۆلاری بۆ ئیراقێ راگرت و هەموو كۆمبوون و هەماهەنگی و تمویلەك دگەل دەزگەهێن ئەمنی یێن ئیراقێ راگرتن.
راپۆرتا (زە ناشناڵ) ب وێ چەندێ ب دوماهی دهێت كو ئیراقیان تنێ بەری چەند مەهان ب ئۆمێدەكا مەزن دەنگ دابوو، بەلێ نوكە رێككەفتنێن گۆماناوی یێن بن بنكی و دەزگەهێن هەواڵگیری یێن وەلاتێن دی بڕیارێ ل سەر چارەنڤیسێ وان ددەن، نوكە دەولەتا وان تنێ بوویە پاشكۆیا ململانێیا هێزێن مەزن و د ناڤ ئاگرەكێ دەڤەری دا دسوژیت كو چو كونترۆل ل سەر نینە. ئەنجامێ ڤێ بێدەنگی و خوەدزینەڤەیا بەغدا ژی، تنێ مەترسییا پێكدادانێن سەربازی یێن پتر و ژناڤچوونا پتر یا ئابوورییا وەلاتی دبیت.
