شۆرشا گولانێ دیاركر كو ئیرادەیا گەلێ كورد ناهێتە شكاندن

نەوزاد زادە

یا خۆیایە رێككەفتنامەیا جەزائیرێ كو د دناڤبەرا رژێما گۆربگۆرا بەعس و شاهێ ئیرانێ دا هاتە ئیمزاكرن كو ئەڤ رێككەفتنامە پیلانەكا هەرێمێ و نێڤدولەتی بوو ل دژی شۆرشا ئیلۆنێ كو ب ئاگەهداری و پشتگیرییا وەلاتێن زلهێز یێن وی سەردەمی هاتە ئەنجامدان، ئەڤ پیلانە بوو ئەگەری هندێ كو شۆرشا ئیلۆنێ تووشی نسكۆیێ ببیت، بەلێ پارتی دیموكراتی كوردستان چ جاران بێ هیڤی و ئۆمێد نەبوویە، ژبەركو هەمی دەما باوەری و پشتبەستن ب گەلێ كوردستانێ كریە، لەوما سەركردایەتیا پارتی دیموكراتی كوردستان ل ژێر چاڤدێریا جەنابێ بارزانیێ نەمر و راسپاردەیێن جەنابێ سەرۆك مسعود بارزانی شۆرشا گولانێ ل ۲٦ گولانا سالا ۱۹۷٦ هاتە راگەهاند، كو هەر ل دەستپێكا ڤێ شۆرشی دەست ب چالاكیێن سیاسی و لەشكری هاتنەكرن ل دژی دوژمن و داگیركەرێن كوردستانێ و ئەڤ شۆرشە بوو جهێ ئومێدا گەلێ كوردستانێ، لەوما ل هەمی چین و تەخان ل سەرانسەری كوردستانێ پەیوەندی ب شۆرشێ كرن و ب سەدان داستانێن قەهرەمانیێ هاتنە تۆماركرن مینا داستانێن خواكۆرك و كانیماسی و دێرەلۆك…هتد. شۆرشا گولانێ بەرسڤەك بوو بۆ داگیركەر و وەلاتێن زلهێز و هەرێمی ژی كو گەلێ كوردستانێ دەستان ل خەبات و بەرخۆدانێ بەرنادەن، ژبەركو باوەری ب دۆزا خۆ یا رەوا هەیە و خۆدان مافن، ئەڤ شۆرشە بوو ئەگەر و‌ پشتەڤان كو ل ژێر سەرپەرشتیا رێزدار جەنابێ سەرۆك بارزانی سەرۆكی وی دەمی یێ بەرەی كورستانێ كو گەلێ كوردستانێ ل بهارا سالا 1991 سەرهلدانێ ل دژی رژێما بەعسا گۆربگۆر بكەت و تەڤایا كوردستانێ رزگارببیت ب كەركووكا دلێ كوردستانێ ژی ڤە و هەرێما كوردستانێ ئاڤابوو ب سازیێن خۆ یێن فەرمی ڤە وەكی حوكمەت و پەرلەمانی، راستیەكا حاشاهەلنەگرە كو سەرۆك بارزانی ئێكەم كەس بوو كو هەر ئێكسەر پشتی سەرهەلدانێ د ناڤ جەماوەرێ قەزایا كویێ بەحسی ئاڤاكرنا سازییان ب رێكێن دیموكراسی و هەلبژارتنێ كری.
یا دیار و بەرچاڤە كو سەركەفتنا هەر گەلەكێ ل هەر تشتەكێ زێدەتر یا گرێدایە ب ئیرادەیا وێ ڤە كو شۆرشا گولانێ پشتی نسكۆیا شۆرشا ئیلۆنێ دەربرین بوو ل ئیرادەیا ب هێز یا گەلێ كوردستانێ كر كو ئەڤ دەستكەفتێن نوكەژی بەرهەمێ وێ شۆرشێنە، ل دوماهیێ دبێژین هزاران سلاڤ ل گیانێ پاكێ شەهیدێن شۆرشا گولانێ و تەڤایا شەهیدێن بزاڤا رزگاریخوازا كوردستانێ سەروەرێ وان بارزانیێ نەمر و كاك ئیدریسێ هەردەم ساخ.

کۆمێنتا تە