شۆڕشا 26ێ گولانێ بوویە هێڤێنێ ئەڤرۆ یێ گەلێ كوردستانێ
غەریب یوسف مزووری
پشتی نسكۆیا سالا (1975) رژێما ئیراقێ یا وی سەردەمی وەسا هزر دكر كو ئێدی كورد نەمان و شۆڕش ب دووماهی هاتن، لێ نەزانین پشتی بۆرینا كێمتر ژ سالەكێ دێ شۆڕش دەستپێكەتە ڤە و ناڤودەنگیا كوردان و پێشمەرگەی ل هەموو جیهانێ بەلاڤ بیت، لەورا بۆ دەستپێكرنا شۆڕشا 26 گولانا سالا 1976 ب سەرپەرشتیا بارزانیێ نەمر ئامادەكاریێن باش هاتنە كرن و ل باژێرێ نەغەدە ل رۆژهەلاتێ كوردستانێ هژمارەكا كۆمبوونان ل گەل (مەسعود بارزانی و ئدریس بارزانی و ئەسعەد خۆشەڤی) هاتنە كرن و پلانەكا باش بۆ دەستپێكرنا شۆڕشێ هاتە دانان و ل سەر فەرمانا مەلا مستەفا بارزانی دو سەركردە هاتنە دەستنیشانكرن كو بچنە دەڤەرا بەهدینان دا بەرهەڤیێن شۆڕشێ بكەن، ئەو ژی هەردو خودێ ژێرازیان (كەریم شنگاری و جەوهەر نامق سالم/سەلیم سۆرانی) بوون، پشتی دگەل هژمارەكا پێشمەرگەی سنۆر دەربازكرین و هاتینە دناڤ ئاخا كوردستانێ دا پەیوەندی ب (حەجی عومەر شەتونسی) كرن و چوونە بارەگایەكێ پێشمەرگەی و ل وێرێ دەست ب كۆمبوون و دیتنێن خۆ ل گەل خەلكێ دەڤەرێ، هەروەسا دگەل پێشمەرگەی كرن، هەروەسا سەرەدانا چەند خەباتكەر و ریهیسپی و ماقیلێن دەڤەرێ كرن و گۆتنە وان ل سەر فەرمانا (بارزانیێ نەمر) جارەكا دی دێ دەست ب شۆڕشێ هێتە كرن و تشتێ هەرە باش ئەوە هەموویان بەرهەڤیا خۆ بو دوبارە دەستپێكرنا شۆڕشێ كرن و گۆتن (ئەم ب سەر و مالێ خۆڤە بۆ شۆڕشێ دحازرین) پشتی بەرهەڤیەكا باش و دەستنیشانكرنا رۆژەكێ بۆ دەستپێكرنا شۆڕشێ، كو ئەو ژی 26 گولانێ بوو، ل چەند میحوەران شۆڕشێ دەستپێكر، هەرچەندە ل وی دەمی بتنێ چەكێ سڤك د دەست پێشمەرگەی دا بوو، لێ ژبەركو ئیرادەیا وان بۆ شۆڕشێ و ڕێبازا پیرۆزا بارزانی یا بهێز بوو، شیان دربەكێ مەزن ل سوپایێ ئیراقێ بدەن و چەندین ئەفسەر و پلەدار و سەربازێن وان هاتنە كوشتن و كەلەخێن وان ل مەیدانێن شەڕی مان، هەروەسا هژمارەكا زۆر ژی ژێ هاتە ئێخسیكرن و پشتی چەكێن وان ژێ هاتینە وەرگرتن ل سەر فەرمانا (بارزانیێ نەمر) هەموو ئێخسیر هاتنە ئازادكرن، هەر ل وی دەمی شەهیدێ سەركرە (سامی شنگاری) دگەل كۆمەكا پێشمەرگەی درێكا سوریێ دا گەهشتنە ناڤ رێزێن پێشمەرگەی و ئاگرێ شۆرشێ گەشتر لێ هات و پتریا كەنالێن راگەهاندنێ یێن جیهانی، ژوانا (دەنگێ ئەمریكا و مونتیكارلۆ) دەنگوباسێن دەستپێكرنا شۆڕشێ و سەركەفتنێن پێشمەرگەی بەلاڤكرن، هەروەسا پەیامنێرێن چەندین كەنالێن جیهانی ژی ب رێكێن جودا خوە گەهاندنە ناڤ شۆڕشێ و راپۆرت و دیدار ل سەر سەركەفتێن پێشمەرگەی چێكرن، لەورا دشێم بێژم شۆڕشا 26 گولانێ بۆ هێڤێنێ ئەڤرۆ یێ گەلێ كوردستانێ و كاروانێ شۆڕشێ یێ بەردەوام بوو و رۆژ بۆ رۆژێ گەشتر و بهێزتر لێ دهات، هەتا گەهشتیە سەرهلدانا پیرۆزا سالا (1991) و د ئەنجامدا بۆ جارا ئێكێ پەرلەمان و حكومەتا هەرێما كوردستانێ هاتنە پێك ئینان و ئێدی درێژی ب خەباتا مەدەنی هاتە دان و ئەڤرۆ ئەم تێدا دژین بەرهەمێ شۆڕشا گولانێ و شۆڕشا ئیلۆنێ و هەموو شۆڕشێن دی یێن كوردستانێ یە، كو ب خوینا هزارەها پێشمەرگەی هاتیە رزگاركرن و ئەڤرۆ هەموو خەلكێ مە ل هەرێما كوردستانێ یێ ب ئازادانە دژین و سەركردایەتیا مە ژی ب رێبەریا مەرجەعێ كوردان سەرۆك (مەسعود بارزانی) یێ كاری بو راگەهاندنا دەولەتا كوردی دكەن و ئەم ب باوەرین ل سەر دەستێ پیرۆزێ سەرۆك بارزانی دێ وێ رۆژێ ژی ب چاڤێن خۆ بینین،
ل دووماهیێ ب هەلكەفتا بۆرینا (50) سالان ل سەر دەستپێكرنا شۆڕشا گولانێ ئەم سەرێ رێز و نەوازشێ بۆ شەهیدێن كوردستانێ و سەروەرێ وان بارزانیێ نەمر و ئدریسێ جانەمەرگ دچەمینین و داخوازا ژیەكێ درێژ و ساخلەمیەكا باشتر بو سەرۆك بارزانی دكەبن.
