بەرهەمئینانا كارەبێ بۆ هزار و 600 مێگاواتان كێمبوویە
هەولێر، قائید میرۆ:
پەیڤدارێ وەزارەتا كارەبێ دیار كر، ژ بەر هێرشا ل سەر كێلگەها كۆرمۆر بەرهەمئینانا كارەبێ كێم بوویە و گەهشتیە هزار و 600 مێگاواتان و دبێژیت: هەكە پرۆسا بەرهەمئینانا غازێ ل كێگەها كۆرمۆر ئاسایی ببیت، د دەمێ 24 دەمژمێران دا دێ رەوشا كارەبێ ئاسایی بیت.
ئومێد ئەحمەد، پەیڤدارێ وەزارەتا كارەبێ بۆ رۆژناما ئەڤرۆ دیار كر، هێرشا ل سەر كێلگەها كۆرمۆر یا بەرهەمئینانا غازێ بوویە ئەگەرێ راگرتنا غازێ بۆ وەستگەهێن بەرهەمئینانا كارەبێ و گۆت: «د دەمێ نوكە دا بەرهەمئینانا كارەبێ كێم بوویە و گەهشتیە هزار و 600 مێگاواتان، چونكی غاز ب ئێكجاری هاتیە بڕین و چو بەرهەمەكێ غازێ ل كێلگەها كۆرمۆر ناگەهیتە وەستگەهێن بەرهەمئینانا كارەبێ، ئەگەر بزاڤێن كارمەندێن وەزارەتا كارەبێ نەبانە ئەڤە مەترسی هەبوو كارەبا نشتیمانی هەر نەمینیت».
ئومێد ئەحمەد گۆتژی: «نوكە ل باعەدرێ و دوكان و دەربەندیخان و خەبات و خۆرمەلە بەرهەمێ كارەبێ هەیە، هەرچەندە ڤەگەڕاندنا غازێ ل كێلگەها كۆرمۆر پرۆسەكا ئالۆزە، بەلێ ئەگەر غاز ڤەگەڕیت بۆ وەستگەهێن بەرهەمئینانا كارەبێ، د دەمێ 24 دەمژمێران دا دێ بزاڤان كەین بەرهەمئینانا كارەبێ ئاسایی ببیت، چونكی راگرتنا غازێ زیانێن مەزن بۆ كەرتێ كارەبێ هەبووینە».
