بەرهەمێ كونجیێن ئەڤ سالە ل دەڤەرا ئامێدیێ پتری دو ملیار دینارانە
ئامێدیێ، مەحمود نهێلی
ل سنوورێ دەڤەردارییا ئامێدیێ ئەڤ سالە نێزیكێ 1500 دونەمێن ئەردی بۆ مەبەستا چاندنا كونجیان هاتینە ب كارئینان و داهاتەكێ باش بۆ جوتیاری بەرهەم دئینیت و جوتیار ژی دبێژن: بەرهەمێ كونجیان ئەڤ سالە باشتر بوویە ژ سالێن بووری.
لقمان عزیز ئێك ژ جوتیارێن ناوچەدارییا دێرەلۆكێ یە دبێژیت: هەموو سالان ئەز ب كارێ چاندنا كونجیان رادبم و گۆت: كونجیا دەڤەرا مە هەموو سالان یا باشە لێ ئەڤ سالە باشترە ژ سالێن چوویی ژ بەر كو ل سالێن چوویی دەرامەتێ كونجیێ نەهند یێ باش بوویە و گۆت: ل دەڤەرا مە گەلەك جورێ، كونجیان دهێنە چاندن لێ كونجیا هەری سەركەفتی یا كوردیە و ئەوا د بەرێ دا دهاتە چاندن.
و گۆت: بهایێ كونجیا دەڤەرا وان گەلەك باش بوویە، ل سالێن بووری كێلویا كونجیێ دناڤبەرا 6 بۆ 8 هزار دیناران دا بوویە و ئەڤ سالە چێدبیت تا 10 هزاران ژی بهێتە فرۆتن، ژ بەر كو بەرێ وەلاتیان ژی كەفتیە بەرهەمێ نافخۆیی ژ بەر كو وان باوەری ب بەرهەمێ دەرڤە نەمایە.
ئەندازیارێ چاندنێ عسمەت ئیراهیم بەرپرسێ هوبا چاندنا دێرەلۆك بۆ رۆژناما ئەڤرۆ دیار كر، ل سنورێ رێڤەبەریا وانا چاندنا كونجیان سال بۆ سالێ پتر لێ دهێت، ژ بەر كو بەرهەمێ وێ یێ باشە و تاما وێ ژی یا خوەشە و گۆت: ئەڤ سالە خوشبەختانە دورێن پتر ژ هزار دونەمێن كونجیان هاتینە كرن و پتری وان ژی ل سنوورێ ناوچەدارییا دێرەلۆكێ بوویە.
و خویاكر، ژ بلی ڤان چەمان هند ژ جوتیاران ل بەر ئاڤا رووباری كونجی چاندی نە و ژ بەر ڤێ یەكێ ژی ئەڤ سالە بەرهەمێن چاندنا كونجیان زێدەبوویە و هەر چەندە بەرهەمێ وێ ئەڤ سالە باشتر بوویە ژ سالێن چوویی.
ل گۆر وان زانیاری و داتایێن تەخمینی یێن ب دەست رۆژناما ئەڤرۆ كەفتین بەرهەمێ كونجیێن ئەڤ سالە ل سنوورێ دەڤەردارییا ئامێدیێ دگەهتە نێزیكی پتر ژ دو ملیار دیناران.
