بەری جەژنێ هزار و 33 پارچەیێن ئەردی دێ هێنە بەلاڤكرن
رەمەزان زەكەریا:
دكتۆر دلاوەر بوزۆ، دەڤەردارێ ئاكرێ د كۆنگرەكێ رۆژنامەڤانی دا نووترین پێزانین و ئامارێن گرێدایی بەلاڤكرنا پارچەیێن ئەردی ل سنۆرێ دەڤەرداریێ و ناوچەداریێن وێ ڕاگەهاندن.
دكتۆر دلاوەر گۆت: «پرۆسەیا بەلاڤكرنێ ب شێوازەكێ پلان بۆ دارێژتی بەردەوامە، د قووناغا ئێكێ دا هزار و 59 پارچەیێن ئەردی هاتبوونە بەلاڤكرن، د قووناغا دویێ دا، بڕیارە هزار و 33 پارچەیێن ئەردی ل رۆژا 21/5/2026 بهێنە بەلاڤكرن بۆ وان ئەوێن ل سالا 2012 رازیبوونا پارچەیێن ئەردی هەی».
دەربارەی مامەلەیێن د ناڤا باژێرڤانیێ دا، دەڤەردارێ ئاكرێ گۆت: «هزار و 450 پارچەیێن ئەردی د بەرهەڤن، دیسا شەش هزار و 427 پارچەیێن دی یێن ئەردی ل باژێرڤانیا ئاكرێ رازیبوون ل سەر هەیە».
دەڤەردارێ ئاكرێ زێدەتر گۆت: «پڕۆسەیا بەلاڤكرنێ و ئامادەكاریان ناوچەداریێن دەڤەرێ ژی ڤەگرتینە، ل ناوچەداریا گردەسێن سێ هزار و 720 پارچەیێن ئەردی رازیبوون ل سەر هەیە، ل ناوچەداریا بجیلێ ژی داخواز هاتیە كرن بۆ بەرفرهكرنا سنۆرێ وێ ژ پێخەمەت دابینكرنا هزار و 700 پارچەیێن ئەردی و كار تێدا بەردەوامە، ل ناوچەداریا دینارتە ژی كارێن یاسایی بۆ دو هزار و 95 پارچەیێن ئەردی د قووناغا كوژاندنێ دانە».
بۆ زانین، ل سەرانسەری پارێزگەها دهۆكێ 86 هزار پارچەیێن ئەردی هاتینە دیاركرن بۆ وێ یەكێ لسەر فەرمانبەر و كەسێن مەرج ل نك بهێنە بەلاڤكرن.
