بەرەڤان حەمدی: پاراستنا ڤێ ئەزموونێ ئەركێ مە هەموویانـە
ئامێدیێ، مەحمود نهێلی:
بەرەڤان حەمدی بەرپرسێ لقێ 18 یێ پارتی د پەیڤەكی دا بۆ هەژمارەكا ریهـسپی و كەساتیێن دڤەرا نهێلێ ل گوندێ بەرچی دیار كر، پاراستن و پێشڤەبرنا ڤێ ئەزموونێ د ستوویێ مە هەموویان دایە و ئەركێ وێ ل سەر ملێ مە هەموویانە و دبێژیت: نوكە پرۆسێسەكا زۆر گرنگ ب رێڤەیە و ب بزاڤ و هیمەتا هەوە هەموویان و ڤان پێشمەرگەیێن قەهرەمان دێ د ڤێ پرۆسێسێ ژی دا سەر كەڤین.
ناڤهاتی دیار ژی كر، ئاڤەدانكرنا دەڤەرێ و گەهاندنا خزمەتگوزاریان پێدڤیەكا سەرەكی یە و گۆت: «د قووناغا ئێكێ دا ئەم شیاینە خەلكێ خوە ب پارێزین، ئەم د ڤێ قووناغێ دا سەركەفتین و د قووناغێن داهاتی دا ژی ئاڤەدانكرن و گەهاندنا خزمەتگوزاریانە و ئەو قووناغ ژی ب رێڤەیە و گۆت: «گەهاندنا جاددەیێ بۆ دەڤەرا نێروە و رێكان دەسپێكریە، دیسا جاددە ل سیارەتیكا هەتا د گەهیتە دێرەلۆكێ دێ بیتە جۆتساید و ئەڤە ژی دێ خزمەتەكا باش یا خەلكێ دەڤەرێ كەت».
گۆتژی: «پێنگاڤەكا دی یا نوو ئەوە پتر گرنگی ب ڤێ دەڤەرێ بهێتەدان و دەستێ خەلكی ب گەهیتە گوندێن وان و دەرامەتێ وان، دێ گەلەك بزاڤان كەین بۆ ڤەگەڕاندنا ئاشتی و تەناهیێ بۆ ڤێ دەڤەرێ».
