بەلاڤكرنا پارچە ئەردان ل ئیدارەیا سەربەخۆیا زاخۆ هێشتا بەردەوامە
بێوار حەمدی
جوداهیەكا مەزن دناڤبەرا زەڤیێن ئاڤەدان و یێن بێی خزمەتگۆزاری داهەیە، شارەزایەكێ خانوبەران ژی گۆت: هێشتا پڕوسێسا بەڵاڤكرنا پارچە زەڤیان ل ئیدارەیا سەربەخۆیا زاخۆ یا بەردەوامە و ب ڤێ پرۆسەیێ، خزمەتەكا مەزن بۆ خەلكێ دەڤەرێ دهێتە كرن.
مەتین عیسا، خودانێ نڤیسینگەهەكا خانوبەران و فەرمانبەرێ پەروەردێ یە د دیدارەكێ دا بۆڕۆژناما ئەڤرۆ گۆت: هەتا نوكە پروسێسا بەڵاڤكرنا پارچە زەڤیان ل ئیدارەیا سەربەخۆیا زاخۆ یا بەردەوامە و نێزیكی 7000 پارچە زەڤی ب سەر وان فەرمانبەران هاتینە بەڵاڤكرن یێن مەرجێ 8 سالێن خزمەتێ تێدا هەی و دیسان 7000 فەرمانبەرێن دی ژی خودانێن هەمان مافن كو د چاڤەڕێبۆنێ دانە ل قوناغێن بهێت پارچە زەڤیێن خوە وەربگرن.
د بەردەوامیا ئاخفتنا خودا دیار كر، ئەو پارچە زەڤیێن هاتینە تەرخانكرن ل زاخۆ دكەڤنە ڤان جهان «ناحیا رزگاری دناڤبەرا گۆندێن سەلكا، خرابدار، خێلەخ» و ژلایێ جوگرافی ڤە دكەڤنە دەڤەرەكا دیمەن خۆش و چیای، لەوما رازیبونەكا باش ل سەر وان و بوهایێن وان هەیە، لێ گازندەیا خەلكی ئەوە ژ سەنتەرێ باژێڕی د دویرن، ژبەر ڤی ئەگەری د نوكەدا ب زەحمەتە بشێین خانیان ل وێرێ ئاڤابكەین.
ل دووماهیێ ژی دا زانین، فەرمانبەرەكێ كو 8 سالێن خزمەتێ هەبن یان ژی ئێكێ دی 20 سالێن خزمەتێ هەبن، د راكێشانا پشككێشا جهێ زەڤیێ دا دیەكسانن و جوداهی دناڤبەرا سالێن وان یێن خزمەتێ دا ژ بۆ زەڤیەكا باشتر ناهێتە كرن.
