ب ئامادەبوونا د. سالار عوسمان یادا نڤیسەر و هونەرمەند « تەها ئەحمەد » بلند هاتە راگرتن
د ڕێوڕەسمەكێ ژ هەژی دا ل رۆژا 31/10/2026 ل باژێڕێ سلێمانیێ، ل ژێر ناڤێ «یادەك د ناڤ پەیڤ و رەنگان دا» بەشێ ڕەوشەنبیری و ڕاگەهاندنا پارتی دیموكراتی كوردستان یادا نڤیسەر و هونەرمەندێ وەغەركری، تەها ئەحمەد ڕەسۆلی بلند راگرت.
ڕێوڕەسم ب ئامادەبوونا د. سالار عوسمان، بەرپرسێ بەشێ ڕەوشەنبیری و ڕاگەهاندنا پارتی د. هەڤال ئەبوبەكر، پارێزگارێ سلێمانیێ و نیاز نووری، نەقیبێ سەندیكا هونەرمەندێن كوردستانێ و هژمارەیەكا بەرپرسێن حزبی و حكومی؛ مالباتا خودێ ژێ رازی تەها ئەحمەد ڕەسول، هەروەسا هژمارەیەكا بەرچاڤ ژ نڤیسەران، ڕۆژنامەڤانان، هونەرمەندان بڕێڤەچوو.
د. سالار عوسمان، بەرپرسێ بەشێ ڕەوشەنبیری و ڕاگەهاندنا پارتی، پەیڤا بەشێ ڕەوشەنبیری و ڕاگەهاندنێ پێشكێش كر و ب هووری تیشك ئێخستە سەر وێستگەهێن كاركرن و خزمەتێن دیار یێن تەها ئەحمەد ڕەسولی ل گۆڤارا «هەردەم» و ڕۆلێ بەرچاڤێ وی د بزاڤا ڕەوشەنبیری و ڕۆژنامەگەری دا و گۆت: «سەرەدانكرن و زیندیڕاگرتنا یادا داهێنەران و ڕەوشەنبیران، ژ ئەركێن بنەڕەتی یێن بەشێ ڕەوشەنبیری و ڕاگەهاندنێ یە».
پاشی، پەیڤا مالباتا نڤیسەر و شێوەكار تەها ئەحمەد ڕەسول ژ لایێ محەممەد ئەحمەد ڕەسول ڤە هاتە پێشكێشكرن، تێدا ژبلی دەربڕینا پێزانینێن كویر بۆ ڕێكخستنا ئەڤێ یادا ژ هەژی، سوپاسیا بەشێ ڕەوشەنبیری و ڕاگەهاندنا پارتی كر بۆ ڤێ وەفاداری و ڕێزلێنانێ ل مێژوو و بەرهەمێن خودێ ژێ رازی.
