ب ئامـادەبوونا د. سالار عوسمان ل ستەنبوولـێ شەڤـا وەفاداریێ بۆ ئیسماعیل بێشكچی ب ڕێڤەچوو
شەڤا وەفاداریێ بۆ ئیسماعیل بێشكچی، ب ئامادەبوونا د. سالار عوسمان، بەرپرسێ پشكا ڕەوشەنبیری و ڕاگەهاندنا پ. د. ك و پتر ژ 100 كەسایەتیێن دیار ل باژێڕێ ستەنبولێ ل رۆژا 15/5/2026 ب ڕێڤەچوو.
د ڕێوڕەسمێ دا، ئیسماعیل بێشكچی ئەكادیمیست و نڤیسەر و بیرمەندێ مەزن و دۆستی گەلێ كورد، ب رێیا ڤیدیۆیێ و ب شێوەیەكێ ڕاستەوخۆ پشكدار بوو و گوتارەك پێشكێش كر، بێشكچی د گوتارا خۆ دا ب گرنگی باس ل ڕۆلێ سەرۆك بارزانی كر و سوپاس و پێزانینێن تایبەتێن خۆ ئاراستەی سەرۆك بارزانی كرن.
د ڕێوڕەسمێ دا پەیاما مەسرور بارزانی، سەرۆكی حكومەتا هەرێما كوردستانێ هاتە خواندن، د پەیاما خۆ دا ئاماژە ب گرنگییا پشكداریێن ئیسماعیل بێشكچی د تێگەیشتن ل ڕاستیێن مێژوویی و جڤاكی یێن گەلی كورد كر.
ئیبراهیم گوربوز، سەرپەرشتیارێ ڕێوڕەسمێ كو ژ لایێ دەزگەهێ ئیسماعیل بێشكچی و دەزگەهێ گونەشتەكین هاتبوو رێكخستن، پەیڤا ب خێرهاتنێ پێشكێشكر و ئاشكرا كر كو ژ لایێ مەسرور بارزانی سەرۆكوەزیرێن هەرێما كوردستانێ ڤە، پارچە زەڤییەك ب ڕووبەرێ 10 دۆنمێن ئەردی ل هەولێرێ بۆ دەزگەهی هاتیە تەرخانكرن.
