ب ئۆمێدین ببیتە ڕۆژەكا دیرۆكی و ناسناڤەكێ دی بۆ كوردستانێ ب دەستڤە بینن
رەمەزان زەكەریا:
د داخویانیەكێ داسەرۆكێ یانەیا ئاكرێ یا وەرزشی ئاشكراكر ئامادەكاریێن مەزن بۆ یاریا فینالێ هاتینەكرن و كارگێرییا یانەیێ ژی جەماوەری پشت راستدكەت كو هەموو رێكار بۆ سەركەفتن و برێڤەچوونا یاریێ ب باشترین شێوە هاتینە رێكخست، ئەوا بڕیارە یارییا فینالێ ل 16ێ ڤێ مەهێ یانەیا ئاكرێ مێڤاندارییا یانەیا ئەلهندییە بكەت، پشتی دەربازبوونە هەر یانەیەكێ ژ كۆما خوە بۆ ڤێ قووناغێ و مسۆگەركرنا وان بۆ خولا پلا دویێ یا ئیراقێ.
محیەدین تەها ئەوچەندە ژی بۆ رۆژناما ئەڤرۆ گۆت: پێشبینی دهێتە كرن بۆ ڤێ یاریێ یاریگەهـ پڕ ببیت ژ پشتەڤانان لەوما پلانەكا تۆكمە ل گەل هێزێن پۆلیسێن پاراستنا یاریگەهێ هاتیە دانان دا كو یاری ب باشترین شێوە بڕێڤە بچیت ئەگەر یانەیا مێهڤان پشتەڤان دگەل بن بێ شك دێ جهێ تایبەت بۆ وان هێتە دابینكرن چاڤەڕێ دكەین عەدنان درجال سەرۆكێ ئێكەتیا تۆپا پێ یا ئیراقێ ئامادەی یاریا فینالێ ببیت، ب ئۆمێدین ببینە ڕۆژەكا دیرۆكی و ناسناڤەكێ دی بۆ كوردستانێ ب دەستڤە بینن .
ناڤبری گۆتژی: مە باوەرییەكا تەمام ب كادرێ هونەری و یاریزانێن خۆ هەیە هەمی یاریزان د بەرهەڤن و هەتا نوكە چ هنگاڤتن نینە ب ئانەهیا خودێ دێ ناسناڤی بۆ ئاكرێ ب دەست ڤە ئینین، كارگێرییا یانەیێ كۆمبوونەك ئەنجامدا بۆ بڕیاردان ل سەر چەوانیا گێڕانا ئاهەنگان بێ دو دلی دێ دگەل پشتەڤانێن خۆ ئاهەنگێن مەزن گێرین و ڤێ سەركەفتنێ پیرۆز كەین.
ناڤهاتی گۆت: كەسێ ئێكێ یێ هاریكارێ دارایی یێ یانەیێ مەردان خدر سەرۆكێ شاناز یێ یانەیێ و بەرپرسێ لقا نەهێ یا پارتی دیموكراتی كوردستانە كو ب شێوەیەكێ زێدە دگەل مە هاریكار بوویە بۆ وەرزێ بهێت ژی د خولا پلە دویا ئیراقێ دا پلان ئەوە كو لایەنێ پارتایەتی د بەردەوام بن وەك پالپشتێ سەرەكی یێ یانەیێ.
بۆ زانین تیما یانەیا ئاكرێ شیابوو ب كۆمكرنا 16 خالان ل ڕێزا ئێكێ ل سەر ئاستێ كۆما ئێكێ بهێت ژ پێنچ سەركەڤتن و وەكهەڤییەكێ و بێ هیچ خوسارەتیەكێ، ژلایێ خوەڤە یانەیا ئەلهندییە ب 16 خالان ل ڕێزا ئێكێ د كۆما دویێ دا هاتبوو، هەردو یانەیان دەربازبوونا خوە بۆ خولا پلا دویێ یا ئیراقێ مسۆگەر كریە.
