ب بـەرهەڤبوونا مەلا مستەفا بارزانـی 43 سالیا جینۆسایدا بارزانیان هاتە ساخكـرن
ب بەرهەڤبوونا مەلا مستەفا بارزانی و كەسوكارێن جینۆسایدكریان، ل رۆژا 31/7/2026 د رێورەسمەكی دا 43 سالیا جینۆسایدا هەشت هزار بارزانیان ل مۆنۆمێنتا جینۆسایدا بارزانیان ل بارزان، هاتە ساخكرن.
د رێورەسمێ دا مەلا مستەفا بارزانی و عەبدولا حاجی مەحمود، وەزیرێ شەهیدان و ئەنفالكریان ل حكومەتا هەرێما كوردستانێ و ب هزارەها كەسوكارێن بارزانیێن جینۆسایدكری و بەرپرسێ لقێ 10 یێ پارتی و بەرپرسێن ئیدارەیێن سەربخۆ یێن سۆران و مێرگەسۆر، هەروەسا هەژمارەكا ئەندامێن پەڕلەمانێ كوردستانێ و بەرپرسێن سیاسی و سەربازی بەرهەڤبوون و تێدا قەفتێن گولان ل سەر مۆنۆمێنتا جینۆسایدكریێن بارزانی هاتنە دانان.
كەریم كاوە، رێڤەبەرێ گشتیێ شەهید و ئەنفالكریان ل ئیدارا سەربخۆ یا سۆران بۆ ئەڤرۆ گۆت: «سالانە بیرەوەریا جینۆسایدكرنا هەشت هزار بارزانیان ب رەنگێن جودا دهێتە ساخكرن، ئەو سالێن روفات هاتینە زڤڕاندن، رێورەسمێن مەزن هاتنە ئەنجامدان و سالێن دی ژی ب رەنگێن تایبەت هاتیە ساخكرن».
ل سپێدەهیا رۆژا 31/7/1983 رژێما بەعسا ئیراقێ ب چەند قووناغان هەشت هزار بارزانی جینۆسایدكرن و هەتا نوكە هێشتا روفاتێن هەموویان بۆ بارزان نەهاتینە زڤڕاندن، ب تنێ روفاتێن 696 شەهیدان هاتینە زڤڕاندن، ل سالا 2005 روفاتێن 503 و ل سالا 2014 روفاتێن 93 و ل سالا 2022 ژی روفاتێن 100 شەهیدان و ل گۆڕستانەكا تایبەت ل بارزان هاتینە ڤەشارتن.
