ب به‌رهه‌ڤبوونا پارێزگارێ دهۆكێ هه‌ژه‌ماره‌كا پڕۆژان ل ئامێدیێ هاتنه ڤه‌كرن
ئامێدیێ، مه‌حمود نهێلی:
ب به‌رهه‌ڤبوونا پارێزگارێ دهۆكێ و هه‌ژماره‌كا به‌رپرسێن حزبی و حكومی دوهی 29/5/2022 چه‌ندین پڕۆژێن خزمه‌تگوزاری هاتانه ڤه‌كرن و به‌رێ بنیاتی ژی بۆ هه‌ژماره‌كا دی هاته دانان و پارێزگارێ دهۆكێ ژی دبێژیت: حوكمه‌تا هه‌رێمێ به‌رده‌وام دێ خزمه‌تا وه‌لاتیان كه‌ت.
دكتۆر عه‌لی ته‌ته‌ر، پارێزگارێ دهۆكێ د په‌یڤه‌كی دا دیار كر، ڤه‌كرنا كارگه‌ها ڤاڤارتنا گلێشی ل ده‌ڤه‌را ئامێدیێ گرنگیا خوه یا هه‌ی و گۆت: “ب ڤه‌كرنا ڤێ كارگه‌هێ دێ ئاریشا گلێشی ل ده‌ڤه‌رێ چاره‌سه‌ر بیت، دیسا ئه‌و كه‌ره‌سته‌یێن د ناڤ گلێشی دا ب هه‌ده‌ر ناچن و پارێ مه ژی جاره‌كا دی دێ زڤڕیته د ناڤ بازارێ مه دا بۆ كڕینا ڤان كه‌ره‌سته‌یان، كو به‌ری نوكه ژ ده‌رڤه دهاتنه كڕین و دێ خه‌لك هه‌موو مفا ژێ وه‌رگریت”.
پارێزگاری ده‌ست خوه‌شی ل كۆمپانیا هیزل كر ل سه‌ر چێكرنا ڤێ كارگه‌هێ و گۆت: “ئه‌م هیڤی خوازین ل جهێن دیتر و كۆمپانیێن دیتر هه‌مان كار ئه‌نجام بده‌ن بۆ مفا وه‌گرتن ژ ماده‌یێ، كو ئه‌م دبێژینێ گلێش، كه‌ره‌سته‌كێ خاڤه و سامانه‌كێ زۆره”.
دیسا گۆت: “ب مخابنی ڤه ژینگه‌ها كوردستانێ گه‌له‌كا هاتیه پیسكرن و بێ ئاگه‌هیا مه هه‌موویان ژی ئه‌گه‌رێ ڤێ پیسبوونێ بوویه و هه‌ر ئێك ژ مه ژ ڤێ ژینگه‌هێ به‌رپرسه”.
ناڤهاتی خویا ژی كر، جهێ ده‌ست خوه‌شیێ یه بۆ كۆمپانیا هیزل و ده‌زگه‌هێ پارتی دیموكراتی كوردستان یێ وه‌به‌رهێنانێ، كو نوكه كۆمه‌كا پڕۆژان ئه‌مجام دده‌ن و هه‌موو ژی گرێدای ژیان و خزمه‌تا خه‌لكی نه.
و پارێزگارێ دهۆكێ گۆت: “هه‌ر د سه‌ره‌دانا خوه دا بۆ ده‌ڤه‌رێ، مه پڕۆژێ وێستگه‌ها گه‌ڕۆك ل شێلادزێ ڤه‌كر، كو پتر ژ دو ملیار دیناران بۆ هاتبوونه ته‌رخانكرن، ئه‌ڤه ژی هه‌تا راده‌یه‌كی دێ ئاریشا كاره‌بێ ل شێلادزێ چاره‌سه‌ر كه‌ت”.
ل دووماهیێ گۆت: “ئه‌و شه‌ڕێ سه‌پاندی، كو مه چ په‌یوه‌ندی پێ ڤه نینه، بوویه ئه‌گه‌رێ هندێ خه‌لك نه‌شێن بچنه سه‌ر گونده‌وارێن خوه و هه‌ژماره‌كا زۆرا خه‌لكی د كۆمه‌لگه‌هان دا كۆم بووینه و رێژا بێ كاریێ زێده‌بوویه و ئه‌ڤ یه‌كه ژی حكومه‌ها هه‌رێمێ به‌رچاڤ وه‌رگرتی یه و گرنگی پتر دایه ئه‌نجامدانا پڕۆژێن خزمه‌تگوزاری یێن ڤێ ده‌ڤه‌رێ”.
