ب زاخهكا بلند دێ ل سهر قهیرانا ئابووری زال بین
ئهڤ قهیرانا ئابوورییا ههرێما كوردستانێ توشی بوویی، دبیت سوود و مفایهك تێدا ههبیت بۆ ههرێما كوردستانێ و خهلكێ وێ، چنكو ل بیرا مه ههموویانه بهری تیروَرستێن داعش هێرش بكهنه سهر ههرێما كوردستانێ و كورد شهرێ بهرهڤانیێ دهست پێ بكهن، گهلهك پارت و لایهن و سیاسهتمهدار ههبوون دگوت: پێشمهرگه بوَچیه ههبیت ئهو پارێ ل پێشمهرگهی دهێته مهزاختن یێ بێ مفایه و هندهك لایهن ژ وێ دوورتر دچوون و دگوتن: بلا هێزا لهشكهری ل كوردستانێ نهمینیت و بهێته ههلوهشاندن، ب ڤێ ئێكێ گرنگی ب هێزا پێشمهرگهی و لهشكهرێ كوردستانێ نههاته دان و هاته پشت گوه ئێخستن، مهشق و راهێنان وهك پێدڤی پێ نههاتنه كرن و پرچهك كرنا وان هاته راوهستاندن، ژ نیشكهكێڤه تیروَرستێن داعش پهیدا بوون و ئهم كهفتینه دهستێن خوه و ژ نوو مه گرنگیا هێزا پێشمهرگهی زانی، ئهم ژلایێ لهشكهریڤه ب خوه دا چووینه خوارێ و ژ ئهوێ خهوا گران هشیار بووین، چنكو ههتا وی دهمی مه گرنگی ب هێزێن پێشمهرگهی نهدا و لهشكهرێ مه بهرف تهمبل بوونێ دچوو و گهلهك كێم و كاسی د ناڤ هێزێن پێشمهرگهی دا ههبوون، بهلێ ب دهمهكێ گهلهك كێم ئهم شیاین ئهوان ههموو كێشهیان چارهسهر بكهین، و زاخ وورهیا پێشمهرگهی بلند بوو و ههموو خهلكێ كوردستانێ ب ههموو لایهنێن سیاسیڤه پشتهڤانی ل هێزا پێشمهرگهی كر و دهركهفت ههرێما كوردستانێ ل ههموو دهماندا پێدڤی ب هێزهكا لهشكهری یا مهشق پێكری و ئاماده و پرچهك كری ب ههموو پێدڤیێن سهربازی ههیه و بتنێ دلسوزیا وی لهشكهری بۆ ولات و نیشتمانێ بیت.
ئهڤه هاته كرن چنكو خهلكێ مه باوهری ب خوه ههبوو، كو دشێت ل بهرسینگێ دورندهترین رێكخراوا تیروَرستی ل جهیانێ راوهستیت كو رێكخراوا تیروَرستێن داعشه، و ب باوهریهكا موكم وپشتهڤانیهكا باش یا ههموو لایهنان، مه ئهو قهیرانا ترسناك تێپهراند ومه كوردستان پاراست ژ دهستێن هێزێن تاریاتیی و رێكخستیا تیروَرستیا داعش.
ئهم باوهرین ب ههمان بیر و باوهر و زاخ دێ زال بین ل سهر ئهڤێ قهیرانا ئابووری یا بهرۆكێن مه گرتین وئهڤێ قهیرانێ ئهم هشیاركرین ژوێ خهوا گران، ئهڤ قهیرانه دێ مه هاندهت مهزاختیێن خوه یێن رۆژانه و ههیڤانه و ههتاسالانه ژی كێم بكهین، چنكو براستی ئهم ههموو مهزاختیهكا زوَر یا نه سروشتی دكهین، ئهم یێن فێربووین چهوا هاتی وهسان ب مهزێخین، ئهڤ قهیرانه دێ مه فێركهت بها و نرخێ پارهی بزانین و كێم بكهین، چنكو براستی پاره ب رهنج و زهحمهتێ و ماندیبونێ ب دهست ڤه دهێت، دڤێت بزانین چ وهلاتێن دونیایی نین خوه ب هیڤیا داهاتهكی بتنێ ڤه بگریت و چ مللهت ژی نینن نه یێ بهرههم هێنهر بیت و ئهو مللهتێن ب هیڤیا ئێك ڕهنگێ داهاتی بهردهوام مهترسیا قهیرانان ههیه و وهلاتێن پهترۆلی باشترین نموونه نه. مخابن حوكمهتا ههرێما كوردستانێ ژ ههموو سهكتهران پتر گرنگی دا سهكتهرێ پهتروَلی(نهفتێ) و سكهتهرێن دیتر ههموو پشت گوه ئێخستن، لێ پشتی بهایێ پهترولێ هاتیه خوارێ و دیسا برینا بوَدجا ههرێما كوردستانێ ژلایێ حوكمهتا(مهركهزیڤه)، قهیرانا ئابووری ل كوردستانێ سهرهلدا و هێدی هێدی ههموو بوارێن ژیانێ ڤهگرتن و ئهگهر بزڤڕین بۆ پێشی قهیرانێ و هاتنا خوارا بهایێ پترولێ و برینا بوَدجێ دێ بینین پارهكێ زوَر هاته د ناڤ مه دا و ئهم فێری مهزاختنێن رۆكهشی كرین، د وان چهند سالان دا مه دیتییه ههر بینه و مهزێخه و چ پاش خان مه چێنهكرن وهكو دبێژن(دراڤێ سپی بۆ رۆژا رهش ههلگره)، نهوهك حوكمهت و نه وهك وهلاتی مه هزرا ئهڤرۆ نهدكر و د(خیالا)مهدا نهبوو.
ئهڤ قهیرانه دی مه فێركهت و دێ مه گوهۆڕیت ژ گهلهكێ بهرخور بۆ گهلهكێ بهرههم هێنهر و دێ زانین دێ چهوان ئاسایشا ئابووری و ئاسایشا خوَراكی و نیشتمانی پارێزین. بێگومان ئهگهر ئهم ب خوهدا نهچینه خوارێ دێ توشی مهزنترین ههرهشا ژناڤچوونێ بین، ژبهر هندێ بهرههم ئینان و كاركرن برێكێن تهندروست تاكه رێكه مه ژ ئهڤێ قهیرانێ قوَرتال بكهت لهورا دڤێت داهاتێ نیشتمانی بهێته رێكخستن و پێداچوونا مووچه و داهاتێ تاكه كهسی بهێته كرن و وهكههڤیهك دناڤبهرا واندا ههبیت، ئهگهر ئهڤه هاته كرن ب چارێكا ئهوی پارێ نوكه حوكمهت بۆ مووچهیان دمهزێخیت دێ ههموو كێشه پێ چارهسهر بن، دیسا دڤێت حوكمهت گرنگیێ ب ههموو سهكتهرێن دی یێن ژیانی بدهت و ڤهژینیته ڤه وهكو سهكتهرێ گهشت و گوزاری، چاندن و پیشهسازیێ.. هتد، ئهز باوهر دكهم ئهگهر مه ههموویان پێكڤه مللێ خوه دابهر ئهڤێ قهیرانێ دێ ل سهر زال بین، چنكو ئهڤێ قهیرانێ سهبر و ههدار و بزاڤ و كار پێدڤێت، لهورا دڤێت حوكمهت هندهك پێنگاڤێن رژد بهرهڤ چاكسازیا بهاڤێژیت، كونتروَلێ ل سهر بازاری بكهت و ههر وهسا بهێنا خهلكێ تهنگ نهكهت بۆ دانا پێشینهیێن ئاڤاكرنا خانیان ودی كڕیا كارهبێ كێم بكهت و پارێن كامیرێن چاڤدێریا جادێ كێم بكهت ههروهسا كونتروَلێ ل سهر نرخ و بهایێ نشتهگهریا و كلینكێن دكتوران بكهت داكو پێكڤه كونتروَلێ ل سهر ئهڤێ رهوشێ و قهیرانان بكهین و ئهگهر ئهم ههموو پێكڤه چاكسازیێ د ههموو بواران دا بكهین، بهلێ ب مهرجهكی نهك هندهك كهسان ڤهگریت وهندهكێن دی نهڤهگریت، و هندهك ل سهر كیستێ هندهكان زهنگین نهبن، بێگومان دێ ل سهر ئهڤێ قهیرانێ زال بین و ژێ قوَرتال بین.
