ب مۆزیكێ دیرۆك و جوانیا (كۆیێ) ڤەگێڕایە
زنار تۆڤی
مۆزیكژەنێ بەرنیاس (ئاراس كۆیی) نووترین بەرهەمی خۆ ب ناڤێ (باژیرێ كۆیێ) ب شێوێ ڤیدیۆ كلیپ بەلاڤكر و د دیدارەكێ دا بۆ رۆژنامەیا ئەڤرۆ گۆت: ئەڤ بەرهەمێ من یێ نوو، پەیڤ و ئاواز و مۆزیكا وێ من ب خۆ داناینە و د ژەنینا ئۆرگ و عودێ دا من مفا ژێ وەرگرتیە، هەروەسا من شارەزایی د ژەنینا دوازدە ئامیرێن مۆزیكێ دا هەیە، ڤیدیۆ كلیپا سترانێ ژلایێ ئەژی و دەوەن مەولوود ڤە ب بكارئینانا تەكنۆلۆژییا ژیرییا چێكری هاتیە چێكرن، كو ب وێنە و دیمەنان، جوانیێن دیرۆكی و سروشتی یێن باژێرێ كۆیێ نیشاداینە.
هەروەسا گۆت: ئەڤ بەرهەمە بیرەوەریەكا پری سۆز و ناسنامەیە بۆ باژێرەكی كو ژیانا من لێ دەستپێكریە، ئەڤ سترانە ژ دلێ من هاتیە، چونكی كۆیە بۆ من ب تنێ ناڤێ باژێرەكی نینە، بەلكو جهێ ژ دایكبوون، زارۆكینی، خواندن و چێبوونا ئێكەم بیرهاتنێن ژیانا منە و هەردەم ئەز قەردارێ ڤی باژێری مە، من دڤیا ب رێیا هونەری سوپاسی و حەزژێكرنا خۆ بۆ كۆیە دیار بكەم، ناڤەرۆكا سترانێ بەحسێ پەیوەندیەكا كوور یا مرۆڤی ب جهێ ژدایكبوونێ ڤە دكەت، تێدا وینەیێن كۆلانان، قوتابخانێ، هەڤالێن زارۆكینیێ و وان بیرهاتنێن من كو ب دەربازبوونا سالان ژی ژ بیرا من ناچن، بۆ زانین ل دەستپێكێ ئاواز د مەژیێ من دا چێبوو، پاشی من بزاڤكرن تێكستەكی گونجایی بۆ ببینم، من بڕیار دا ئەز ب خۆ هەلبەستێ بنڤیسم.