کوردستان ل ناڤبەرا سێگۆشەیا توخمپەرێسیێ و ئمبراتوریەتێن ئایینی و کڤانێن تایفەگەری وێرانکر
ئيحسان ئــامێدی
کوردستان دۆرپێچکریە ل ناڤبەرا سێ نەتەوەیێن بالا دەست، فارس و عەرەب و تورک، کو سێگۆشەیا توخمپەرێس پێکدئینن و چار دەولەتێن یاسایی، ئیران، تورکیا، ئیراق و سووریا، کو چارگۆشەیا داگیرکرنێ پێکدئینن و دو کڤانێن ئۆلڕێ، شیعە و سونە، کو دو کڤانێن تایفەگەری پیکدئینن و هەمی ژی د رێککەفتینە کوردستانێ وێرانکەن و بزاڤێن وێ یێن نیشتیمانی ژناڤببەن.
کورد مللەتەکێ ئاشتیخواز و خوش باوەرە، ل کوردستانێ ژهەمی ڤان مللەتێن دی کەڤنترە لەوان ژی کوردستان بناڤێ کوردان هاتیە ناڤکرن.
کوردان د کەڤندا هەڤکاریا هەمی ڤان نەتەوەیان کریە، و دگەلدا دەولەت و ئمبراتوریەت و شارستانیەت بۆ ئاڤاکرینە و گەلەک گوری و قوربان داینە، چ ل سەردەمێن ئیرانا و رۆمانیێن کەڤن، یان ل سەردەمێ سەرهلدنا ئیسلامی ل گەل عەرەب و ئوسمانی و سەفەویان و کۆما دەولەتێن دیتر، یان ل سەردەمێن دەولەتێن نوی چێکری، هەمیان ژی کورد بێ بەهرکرینە ژ مافێن هەڤپشکیێ و پشکداریێ، خۆ شایستەیێن قوربانیدانێ ژی پێنەداینە!.
د چێکرنا دەولەتێن نوی دا، ئیران، تورکیا، ئیراق و سووریا، کوردستان ب خورتی یا داگیرکری و بێی پرسێ لێ بهێتەکرن دابەشکر و ل سەر لێکڤەکرن و کرنە پشکەک ژ وان دەولەتێن نوی چێکرین، کورد ب سادەیا خۆ وەکو جاران ب دلسۆزانە خزمەتا ڤان دەولەتان ژی کر، و وەکو جاران دەستهەلاتدارێن ڤان دەولەتان سیاسەتا داگیرکرنێ و بۆهژاندنێ و ژێبرنا کەساتیا کوردی بکارئینا، و ژ مافێن وان یێن رەوا بێ بەهرکرن.
دیارە ژێرێ خۆ سەپاندنێ و فراوانخوازیێ و تەپەسەرکرنا یێ دیتر هێشتا جێگیرە ل دەف ڤان نەتەوەیان، و هەر وێ سیاسەتێ دکەن، تنێ ئامێرە و رێباز هاتینە گوهۆڕین، لەوان ناهێتە پێشبینیکرن خۆدانێن ڤی ژیرێ کەڤنار سیاسەتێن سەردەمیانە بکەن و رێزێ ل مافێن مرۆڤان و یێ مللەتان بگرن.
نوکە و ل سەردەمێ دەولەتێن چێکری پشتی جەنگێ جیهانیێ ئێکێ و لێکەفتێن وێ، کو هەمی ئەو دەولەت بخۆ ژی ژوێ دابەشکرنێ و چێکرنێ د رازی نینن!، لێ بەهرا کوردستانێ ژ لایێ وان نەرازیان ڤە ژێ هەر داگیرکرن و سەرکوتکرن بوو،! و ب وێ ژی رازی نەبوون یێ رێکەفتنێن هەرێمایەتی پێکدئینن و کڤانێن تایفەگەری چێدکەن داکو کوردستانێ ژ مافێن وێ یێن رەوا بێ بەهرکەن!.
ژبلی هەرێما کوردستانێ کوردان د چ سەردەمان دا دەستکەفتیەکێ نەتەوەیێ بنەجهـ ب دەستڤەنەئینایە، ئەڤا هەیی ژی کەفتیە بەر گڤاشتن و لێدانێن دەولەتێن هەرێمایەتی و کڤانێن تایفەگەری!.
بڤێ و نەڤێ ئەڤە وەلاتێ کوردانە و ل ڤێ جوگرافیێ دا د جێگیرن و جیران ژی ئەڤ توخمپەرێس و تایفەگەرن، نە کورد واری خۆ دهێلین و نە جیران دەستبەرداری دەستدرێژی و دوژمنکاریێن خۆ دبن، و ئەڤ هەبوونە ژی شەرەنیخەکا بەردەوامە و هەردەم ب سەر وستویێن هەڤ ڤەنە!. ئەرێ حەتا کەنگی، ما داگیرکەر ژ کوشتن و وێرانکرنی تێر نەبوون، و ما وان دل ب مرۆڤێن خۆ ژی ڤە نینە!؟.، لێ دیارە مرۆڤان ل دەف دەستهەلاتدارێن ستەمکار چ بها نینە، ئێدی هەر چیا ژێ دهێت دکەن بۆ سەپاندنا مان و بەرژەوەندیێن خۆ.
هێشتا ئەڤ نەتەوەیێن بالادەست کو بووینە دەولەتێن یاسایی، توخمپەرێستیێ و تایفەگەریێ دکەن و ب شەڕ و ب پێکدادان و بهەڤچوونێن بەردەوام دانە، ل ئیرانێ دەولەتا شیعەیان چێکر و دەستێ خۆ ل رۆژهەلاتا ناڤین درێژکر و کڤانێ شیعەیان ژ ئیرانێ بۆ ئیراقێ و سووریا و باشورێ لوبنانێ بۆ یەمەنێ چێکر، هەر دژایەتیا کوردستانێ کر، پشتی لێدانا وێ و برینا هندەک چەنکێن وێ، کڤانەکێ سونەیان هاتە چێکرن ژ تورکیا بۆ سووریا و سعوودیە و پاکستانێ، ئەو ژی ل دژی کوردستانێ یە، دیارە د هەمی رەوشان دا بۆ کوردستانێ خرابە، چونکی ئەقلیەتا بالادەست ل دەف جڤاکێن ڤێ دەڤەرا جیهانێ، ئەقلیەتەکا خۆ پەرێس و توخمپەرێس و خۆ سەپێنە، دانێ ب یێ دیتر نادەن، و هەردەم سیاسەتا پشتقراندن و تەپەسەرکرن و ژناڤبرنا یێ دیتر دهاژۆن، خۆ ژی تووشی کێشەیا دکەن و گەفان ل یێ دیتر دکەن و مەترسیان چێدکەن و شەڕ و پێکدادانان دکەن و زیان ب هەمیان دکەڤن.
د ڤی ژیواری دا چاڤەڕێی چ بین؟ و چ د شیانان دایە بهێتەکرن؟. دبێژن داکۆ گوهۆرینەکا رهوریشالی د ڤێ رەوشێ دا چێبیت، پێدڤییە هۆکارێن ناڤخۆیی و یێن بابەتی پێگەهشتی بن و د هەڤکار بن، لێ دیارە هۆکارێن ناڤخۆیی ل ئاستێ پێدڤی نینن، ژبەر ناکۆکیێن ناڤخۆیی و نەبوونا پرۆژەیەکێ نەتەوایەتیێ گشتگیر و پێگیر و هۆکارێن بابەتی ژی د هاریکار نینن، ژبەر دژاتیا دەولەتێن داگیرکەر و ئەو دەولەتێن دیموکراتییێن خۆ ب دوست دانن و پشتەڤانیا مافێن مرۆڤی و مافێن گەلان دکەن د ئامادە نینن بەرژەوەندیێن خۆ ل گەل ڤان داگیرکەران تێکبدەن و پشتەڤانیا گەلێ کوردستانێ بکەن!؟.
هەروەسا دبێژن گوهۆڕین و وەڕار پێدڤیەک و پرۆسەیەکا هەروهەرە د بیروهزر و باوەر و رەفتاران دا، بەلێ ئەڤە ب کریار د ژیرێ سەرانێن دەستهەلاتدارێن داگیرکەران دا ناهێتەدیتن!، و هەر چەندە ئەڤە د شیانان دایە، ژبەرکو مرۆڤ گوهۆڕەکە وەڕارێ دکەن، دشێن باشی و خرابییان ژیکجودا بکەن و یا باشتر بهەلبژێرن و بکەن، لێ هەتا نوکە چ دەستپێشخەریێن چارەسەرکرنێ ژێ نەهاتینە دیتن!.
دیالۆگ و گفتوگۆ رێبازەکا سەرکەفتیە بۆ گوهۆرینان و لێکتێگەهشتنێ و چارەسەرکرنا گێشەیان و زانست و تەکنولۆژیا و زانیاریێن ژیانێ و بەهایێن مرۆڤی و جیهانیبوون خزمەتا ڤێ پرۆسەیێ دکەت و هێدی هێدی یا کارتێکرنا خۆ دکەت ژبۆ گوهۆرینا ژیر و بیر و باوەر و رەفتار و سیاسەتان و د هەمان دەمدا یا پێکدادانێ ل گەل بیروباوەرێن کەڤنار و بەرژەوەندیێن بەرتەنگێن تەنگبینان دکەت.
سەدەیەکێ خەبات و قوربانیدانا کوردستانێ تنێ هەرێما کوردستانێ وەکو هەرێمەکا فیدڕالی ل سەر نیڤا ئەردێ باشوڕێ کوردستانێ هاتیە چێکرن، ئەو ژی هەر لبەر گەف و گڤاشتن و لێدانێ یە!..
پارچەیێن دی یێن کوردستانێ ل بن ناڤێن جوداجودا دهێنە بۆهژاندن و گلڤچاندن و سەرکوتکرن و خۆ داخوازێن ئاشتیانە ژی دهێنە لێدان ب بەهانەیا جوداخوازیێ و یاخیبوونێ!.
سەیرە ئەڤ نەتەوە و تایفەیێن هەرێمایەتی یێن خۆدان دەولەت هەڤدژن و د ململانەکا بەردەوام دانە، هەمی ژی د رێککەفتینە بۆ لێدانا کوردستانێ و سەرکوتکرنا بزاڤێن وێ.
سەر ڤێ چەندێ هەمیێ را گەلێ کوردستانێ وەکو گەلەکێ زیندی و دلخواز و خۆراگر، ئیرادەیا خەبات و بەرخۆدانێ و قەپخوازیێ هەیە و یێ رژدە ل سەر ب دەستڤەئینانا مافێن خۆ یێن رەوا، و بزاڤ و چالاکیێن باش د ڤی بیاڤی دا ئەنجامددەن و ب هیڤینە ب ئارمانجیێن خۆ یێن نەتەوەی بگەهیت و د وەلاتێ خۆدا سەرفراز و بەختەوەر بیت.
