یانەیا ئافرەتێن دهۆكێ گرێبەستا سێ پیشەكاران بۆ خولا ئیراقێ ئیمزاكر
د داخویانیەكێ دا ئەنیس خالد سەرپەرشتێ تیما یانەیا ئافرەتێن دهۆكێ دیاركر كو ب شێوەیەكێ فەرمی كارگێرییا یانەیا ئافرەتێن دهۆكێ گرێبەستا سێ یاریزانێن پیشەكار ژ وەلاتێ ئیرانێ ئیمزاكرن ژبۆ پشكداریێ ل گەل تیما وان یا فوتبۆلێ بۆ وەرزێ نوو 2026-2027 یا خولا ستێرێن ئیراقێ ئەوا دهێتە چاڤەڕێ كرن هەڤڕكیێن وێ ل ناڤەڕاستا مەها بهێت ب پشكدارییا 14 یانەیان و دبیت گوهۆڕن هەبیت ب شێوەیێ خول بهێتە كرن.
زێدەتر ناڤهاتی گۆت: پشتی بۆ ماوەیێ دو حەفتیان شەش یاریزانێن پیشەكار یێن وەلاتێ ئیرانی د تاقیكرنێن ڕاهێنانێ دا و ڕازیبوونا ڕاهێنەرێ تیمێ ئاراز سالحی ب فەرمی گرێبەست ل گەل سێ ژ وان یاریزانان هاتنە ئیمزاكر ئەو ژی هەر ئێك ژ هادیا عەبدوللا گوور ل هێلا بەرەڤانیێ، سامین مەهدی پۆرحسێنی ل هێلا ناڤین وپانیا ئەمیر عەباس ل هێلا هێرشبەریێ، ژبۆ بهێزكرنا ڕێزێن تیما مە بۆ وەرزێ نوو یا خولا ستێرێن ئیراقێ، بڕیارە ل دەمێ بهێت دا گرێبەستا پرانییا یاریزانێن خوە یێن وەرزێ بۆری ڕابگەهینن دگەل ئینانا چەند یاریزانێن ل باژێرێ هەولێرێ و كەركووكێ و سلێمانیێ، ئەڤە ژی هەبوو ژبۆ باشترین بەرهەڤینە بۆ وەرزێ نوو، سەرباری چاڤەڕێ ژڤانێ دوپاتكری نە سەرەرایی هاتیە بەلاڤكرن دبیت ناڤەڕاستا مەها بهێت دەستپێبكەت.
ژلایەكێ دووڤە ئەنیس خالد گۆت: پێنەڤێت دڤێت سوپاسیێن بێ سنور ل د. عەلی تەتەر پارێزگارێ دهۆكێ دكەین كو پشتەڤانییا خوە یا تەمام بۆ یانەیا مە كری و دەرگەهێ پشكداریێ بۆ تیما مە ڤەكری ئەڤچەندە بوویە جهێ دلخوەشییا كچێن مە یێن وەرزشڤان ل پارێزگەهێ، هەروەسان سوپاسییا ڕێكخستنا مە یا پارتی دكەین كو هەردەم پشتەڤانێن وەرزشا كچانە و ئەڤە ژی دێ بیتە پالدەرەك كو باشترین شێوە خوە بەرهەڤبكەن و پێشبكەڤین و پتر كچێن وەرزشڤان رۆلێ خوە بینن..
لدۆر وەرزێ ئەڤ سالە ناڤهاتی گۆت: ژبەركو دێ بیتە جارا ئێكێ یە ئەم پشكداریێ د ڤێ خولێ دا بكەین ئەوا بۆ 11 یاریزانی و سیستەم و شێواز و ڕێكارێن وێ ل گەل فدراسیۆنا ئاسیایی و فیفایێ گرێدایە، مە ژی ل دووڤ ڕێنمایان هەر پێنگاڤەكا دروست هاڤێژتیە، بهیڤییا وێ یەكێ پشكدارییەكا سەرفەراز بیت
بۆ زانین یانەیا ئافرەتێن دهۆكێ تاكە یانەیا تایبەتە ب وەرزشا كچان ڤە ئەوا ل سالا 2007ێ ل سەر دەستێ كۆمەكا كچێن وەرزشڤان هاتییە دامەزراندن، سێ ناسناڤێن كوردستانی ل سەر ئاستێ فوتسالێ ب دەستڤە ئیناینە، ناسناڤەكێ ئیراقێ بۆ شەش یاریزانی و ناسناڤێ قارەمانییا پارێزگەهێ ی فوتسالێ ژی ب دەستڤە ئینایە دگەل چەندین ناسناڤێن دی یێن یاریێن جودا ژ وانا تیكۆنجتسۆ و سكەی.
