ب هیڤیا بەندكێ تە كەس نەوێریت بچیتە جەهنەمێ ژی
سیپان لەزگین مستەفا
د جیهانەكێ دا دژین كو ئێدی سنوورێن د ناڤبەرا مفا و زیانێ دا هاتینە بەرزەكرن. مرۆڤ گەهشتینە وی ئاستێ كو هوشیاریا دەربارەی تشتان مفا ژێ دهێت یان زیانێ دگەهینن ئالۆز بوویە، وەك تەرمەكێ بێ گیان. هەست بەرانبەر هەر تشتی سست بووینە و ژیان ب هەمی ڕەنگێن خۆ ڤە بێ ئارامیەكا كویر د سەردەمێ مە دا چاندییە. لێ پرسیار ئەوە: ئەرێ جیهان ل مە بەرزە بوویە، یان مە ژیان ل خۆ بەرزە كرییە؟ ئەڤە ئاماژەیە بۆ وێ خەمساریێ كو ئەم ل هیڤیا هندێ نە ئێك دەستێ مە بگریت یان موعجیزەیەك چێببیت، بێی كو ئەم ب خوە پێنگاڤەكێ ب هاڤێژین. مرۆڤێ ل هیڤیێ، ژیانا خۆ د كەتە قوربانییا دەمێ كو نازڤریت. ژ خەونا گران هشیار ببن، ژیان هەلبژارتنا مەیە.ئەم دكەینە ستۆیێ قەدەرێ و جڤاكی.
هەكە سەحكەینە گەنجی د خولا هەدەركرنا تەمەنی دا ل دەوروبەرێ خۆ، گەلێن دی ب ڕێكا «خواندنێ» گەهشتینە لۆتكەیێ، لێ ل جەم مە، خواندن بوویە تنێ «دەم بوراندن». گەنجێ مە 16 سالێن زێڕین یێن ژیێ خۆ ل سەر كورسیێن دبستانێ دەرباز دكەت، لێ دەما ژێ دپرسن تە چ كر؟ دبێژیت: «من تەمەنێ خۆ هەدەر كر». ئەو هەمی كێماسی و شكستێن ژیانێ دكەتە ستۆیێ دەوروبەر و جڤاكی، و خۆ ب بێ كێماسی دبینیت. كارەسات ئەوە، پشتی وان هەمی سالان، هێشتا ل سەر پێیێن خۆ نەراوەستایە و ژ لایێ زانستی و پەروەردەیی ڤە یێ دەستبەتاڵ. ئەڤجا كلیل د دەستێ گەنجی دایە ودبێژم ئەی گەنجۆ.. كێ دەستێن تە گرتینە ژبۆ ئاڤاكرنا خۆ؟ ئەڤڕۆ د سەردەمێ تەكنەلۆژیایێ دا، فێربوونا هەر زمانەكێ یان هەر بابەتەكێ ب بێ بەرانبەر ل بەر دەستێ تەیە. بهایێ پەرتووكان ل وەلاتێ مە ژ هەر تشتەكێ دی گونجایترە. لێ كێشە نە د نەبوونا كەرەستەیان دایە، كێشە د «فێمكرنێ دایە». فێمكرن و هشیاری هەلبژارتنا دلێ تە یە. كورەبوون و كورەفامی، بڕیارەكا كەسییە.
ڕاستییەكا تەحل، ئێدی دەمێ هندێ هاتیە كو ئەم دانپێدانێ ب راستیێ بكەین. خەتایێ چ كەسێ نینە. ئەگەر تو یێ بێ ئومێدی، ئەگەر تو ژ كاروانێ رەوشەنبیری، كولتوور و جڤاكێ خۆ پاشكەفتی، ئەڤە بڕیارا تە ب خۆ بوویە. تو ئەو كەسی یێ دەست ژ ژیان و ئاڤاكرنا خۆ بەردایی.
ل دوماهیێ دێ بێژم گەلۆ هشیاری ل جەم مە وندا بوویە یان مە خۆ ژێ وندا كرییە؟ پانێ ئەم دنێرینە دەوروبەرێ خۆ، گەلێن دی بتنێ ب بەردەوامیا خواندنێ گەهشتنە هەر تشتەكێ. هشیار ببە! ژیان ل هیڤیا كەسێ نامینیت كو بتنێ ل سەر «بەندكێ هێڤیێن بێ بنەما» ڕاوەستابیت. یان دێ ب هێزا زانست و كاركرنێ خۆ ئاڤا كەی، یان دێ مینیە ل سەر پەڕێن ژبیركری یێن مێژوویێ.
