دیاردەیا هەدەردانا ئاڤێ
دلۆڤان ئاكرەیی
ماوەیەكە د ناڤ جڤاكی دا، دیاردەیا ب هەدەردانا ئاڤێ ب بێ ئەگەر (ب تایبەت شوشتنا جادە و كۆلانان ژلایێ هندەك وەلاتیان ڤە) بوویە جهێ دلگرانییا پتریا مە و ئەڤ ئاریشەیە نە بتنێ هەدەردانا سامانەكێ سروشتی یە، بەلكو كاریگەریێن نەرێنی ل سەر ژینگەهێ و ژێرخانا باژێری ژی دروست دكەت.
كاریگەریێن نەرێنی یێن ڤێ دیاردەیێ: كێمبوونا ئاڤا ڤەخوارنێ: بكارئینانا ئاڤا تۆرا گشتی بۆ مەبەستێن نە پێدڤی، دبیتە ئەگەرێ كێمبوونا رێژەیا ئاڤێ ل دەڤەرێن دی، تێكچوونا ژێرخانا باژێری: ئاڤا زێدە یا ل سەر جادەیان دچیتە د تۆرەیێن ئاڤڕێژان دا، ئەڤەژی دبیتە ئەگەرێ تێكچوونا چینێن ڤەكۆلینا جادەیان و دروستبوونا چاڵ و كووران.
پیسبوونا ژینگەهێ: شوشتنا بێ پلان یا جادە و كۆلانان، چپكێن پیساتی و پیش و پەلەخی تێكەل دكەت و ڤەدگۆهێزیت بۆ سەر ڕوویێ ئەردی و ڕێورەوان.
رێكێن چارەسەركرنێ و هۆشیاركرنێ: هۆشیاریا جڤاكی: گرنگە كار ل سەر هۆشیاركرنا جڤاكی بهێتە كرن، ب ڕێكا ئایینگەهـ، مۆهلەت و تۆڕێن جڤاكی دا كو بهێتە دیاركرن ئاڤ سامانەكێ گشتییە و پاراستنا وێ ئەركەكێ ئایینی و نیشتمانییە.
رێكارێن یاسایی: پێدڤییە لایەنێن پەیوەندیدار (ژوان ژی باژێرڤانی و پۆلیسێن ژینگەهێ) سزایێن دارایی یێن توند ب سەر وان كەسان دا سەپێنن یێن ب بێ ئەگەر ئاڤێ هەدەر ددەن.
رێكارێن جێگر: هەكە پێدڤی بیت جادە بهێنە پاقژكرن، بلا ب ڕێكا بەلاڤكەرێن ئاڤێ یێن تایبەت (تانكێن ئاڤێ یێن باژێرڤانیێ) و ب ڕێژەیەكا گونجای بیت، نەك ب لولەیێن ئاڤا ڤەخوارنێ یێن ڕاستەوخۆ.
دیڤچوون: لیژنەیێن تایبەت بهێنە پێكئینان بۆ راكرن و نەهێلانا وان هێلێن زێدەیێن دۆر ل چاڤێ قانوونێ هاتینە كێشان و ب رێكێن نەیاسایی هاتیە گرێدان ب تانكی و بۆ هەدەردانێ دهێنە ب كارئینان و پێدڤی یە رێژەیا ژمارەیا ئەندامێن خێزانێ ببیتە پیڤەر یان ب هویری پشكنینا هێلێن زێدە بهێتە كرن دا كو ئەو ئاڤا زێدە یا ڤان گەڕەكان بۆ گەڕەك و خێزانەكا دی مفای لێ ببینیت.