ب وێنە ھەلبژارتیێ کوردستانێ سێ مەدالیێن زێری د قارەمانیا ئاسیا دا ب دەستخوڤە ئینا
ئەڤرۆ نیوز،ھەژار مەعروف:
ھەلبژارتیێ کوردستانێ د قارەمانیا ئاسیا یا ڤەکری یا کینگ بوکسێ دا شیا ئەنجامێن سەرکەفتی د قارەمانیێ دا ب دەستخوڤە بینت ئەوا نوکە ھەڤرکیێن وێ ل وەلاتێ لبنان دھێنەکرن ب پشکداریا ھژمارەکا مەزن یا وەلاتێن ئاسیا و عەرەبی، یاریکەرێن ھەلبژارتیێ کوردستانێ سێ مەدالیێن زێری ب دەستخوڤە ئینان.
ھەلبژارتیێ کوردستانێ ب دەھـ یاریکەران پشکداری د ڤێ قارەمانیێ دا کر بوو کو پێنج ژ ئەوان یاریکەران ژ پارێزگەھا دھۆکێ بوون ئەوژی سیاڤ سەلاح،عەلی عزەت و عەبدرزاق سەعید شێخو ژ یانا دھۆک و ئیبراھیم محەمەد عەلی ژ یانا ئامێدیێ و دیار حەسەن سالح ژ زاخۆ.
ھەرسێ یاریکەرێن یانا دھۆک شیان ئەنجامێن باش ب دەستخوڤە بینن ئەوێن ب ناڤێ ھەلبژارتیێ کوردستانێ پشکداری کری ئەوژی سیاڤ سەلاح ب ب کێشا ٥٥ کیلو شیا مەدالیا زێری ب دەستخوڤە بینت پشتی شیای د ھەرسێ یاریێن خوە یێن قارەمانیێ دا ب سەرکەفیت، عەبدرزاق سەعید شێخو ژی شیا مەدالیا زێری ب دەستخوڤە بینت ب کێشا ٩٠ کلیو پشتی د دو ھەردو یاریێن خوە دا شیای سەرکەفتنێ ل سەر ھەڤرکیێن خوە توماربکەت و عەلی عزەت مەدالیا زیڤی ب دەستخوڤە ئینا ب کێشا ٦٥ کلیو، یاریکەرێ یانا ئامێدی ئیبراھیم محەمەد عەلی رێزا سیێ د قارەمانیێ دا ھات و یاریکەرێ یانا کەرکوک ئەحمەد دلشاد ب کێشا ٦٠ کلیو شیا مەدالیا زێری ب دەستخوڤە بینت.
سەلاح کەکو راھێنەرێ یانا دھۆک ئەوێ ژبەر چەند ئەگەران نەشیا وەکو راھێنەر ل گەل ھەلبژارتیێ کوردستانێ دڤێ قارەمانیێ پشکدا بیت د داخویانیەکێ ل سەر ڤێ قارەمانیێ بۆ رۆژناما ئەڤرۆ دیارکر پەیوەندیێن وی بەردەوام بوون ل گەل ئەڤان یاریکەران و ئەڤ قارەمانیا یا پیشەکارە ل ئێکەتیا کینگ بوکسێ یا وەکا یا نیڤدەولی کو چەندین یاریکەرێن بەرنیاس ل سەر ئاستێ ئاسیا پشکداری دڤێ قارەمانیێ دا کری یە و ھەلبژارتیێ کوردستانێ شیا لژنەیا ڤێ قارەمانیێ ل ماوێ بوری رازیبکەت پشتی ئێکەتیا کوردستانێ یا کینگ بوکسێ داخوازی ژ ئێکەتیا ناڤبری کری بۆ پشکداریێ دڤێ قارەمانیێ دا و لژنەیا وێ قارەمانیێ ژی شارازیەکا باش ل سەر کوردستانێ ھەیە و ل سەر پشکداریا ھەلبژارتیێ کوردستانێ رازیبووینە بۆ ھەر سال پشکداریێ د قارەمانیێ دا بکەن.
ھەردیسان سەلاح دیارکر ب دەستڤە ئینانا سێ مەدالیێن زێری ل گەل دو مەدالیێن دی دبینت دەستکەفتیەکا مەزنە بۆ ھەلبژارتیێ کوردستانێ و ئەڤ چەندە ژی بۆ وێ چەندێ ڤەدگەریت کو سال بۆ سالێ ئاستێ ڤێ یاریێ یێ پێشکەڤیت .
