ب وێنە: یاریزانێ ئێکێ ژ دھۆکێ بۆ یانا دالکورد بنیاسە
ئەڤرۆ،ھەژار مەعروف:
کورێ باژێرێ دھۆکێ و یاریزانێ ھەلبژارتیێ ھولەندا و یانا ھێرنڤین یا ھولەندی ئەڤرۆ گەھشتە وەلاتێ سوید ب مەرەما ئیمزاکرنا ھەڤبەستا خوە ل گەل یانا دالکورد یا کوردی ئەوا پشکدار دخولا پلا ئێک یا سوید دا پشتی چەندین دانوستاندان ل گەل یانا خوە یا ھولەندی و ل دووماھیێ شیای یانا خوە رازیبکەن بۆ دەست بەردانا خوە ژێ وەربگریت.
د داخویانیەکا تایبەت دا بۆ رۆژناما ئەڤرۆ رێوان ئەمین دیارکر دو یانێن ھولەندی ژی ل دەمێ مێرکاتویا زڤستانێ ب رێیا رێڤەبەرێ کارێن وی داخوازی ژ ئەوی کر بوو یاری ل یانێن ئەوان بکەت لێ پشتی یانا دالکورد ژلایێ سەروکێ فەخری یێ یانێ و ئەندامێ دەستەکا گشتی یێ یانێ سەوری عەبدوللا جنەید داخوازی ژ ئەوی کری بۆ کرنا یاریێ ل یانا ئەوان ئەو رازیبوو ل ڤێ یانێ یاریێ بکەت ژبەرکو خەونا ئەوی بوو خزمەتا یانەکا کوردی بکەت و یانا دالکورد ژی نوونەرا کوردانە دخولا پلا ئێک یا سوید دا و پشتەڤانەکێ مەزن یێ کورد ھەیە ل ھەموو جیھانێ.
ناڤبری زێدەتر دیارکر ھەڤبەستێن یانێن ھولەندی رەتکرن ژ بوو خواترا یانا دالکورد یا کوردی سەرەرای وێ چەندێ کو ھەڤبەستا یانێن ھولەندی وەکو مووچەیێ ھەیڤانە ژ یا دالکورد زێدەتر بوو لێ ئەوی پەیوەندی ب دالکورد کریە بۆ وێ چەندێ بشێت خزمەتا وەرزشا کوردستانێ و تایبەت ناڤێ یانا دالکورد بکەت ژبەرکو ئەڤ یانە ب نوونەرا کوردا دبینت دخولێن ئورۆپا دا و گەلەک یێ کەیفخوشحالە ئەو دێ یاریێ ل ژێر ئالایێ کوردستانێ یێ پیروز ل یانا دالکورد کەت.
