ب پشكداریا 117 هزار قوتابیان ئەڤرۆ دەست ب ئەزموونێن 12 دێ هێتە كرن
هەولێر، قائید میرۆ و زنار:
پەیڤدارا وەزارەتا پەروەردەیێ خویاكر، ئەڤرۆ ب پشكداریا پتر ژ 117 هزار قوتابیان ل سەرانسەری هەرێما كوردستانێ، ئەڤرۆ 14/6/2026 ئەزموونێن ویزاری یێن قووناغا 12ێ ئامادەیی ل هەرسێ پشكێن زانستی و وێژەیی و پیشەیی دێ هێنە ئەنجامدان و دبێژیت: رێكارێن توند هەمبەر وان كەسان دێ هەبن یێن بزاڤێن قوپیایێ دكەن.
پەیمان خەواجە، پەیڤدارا وەزارەتا پەروەردەیێ بۆ رۆژناما ئەڤرۆ دیاركر، هەموو بەرهەڤی بۆ ئەنجامدانا ئەزموونان هاتینە كرن و گۆت: «د دەمێ بڕێڤەچوونا تاقیكرنان دا هێلێن ئنترنێتێ دێ هێنە بڕین و بكارئینانا مۆبایلێ ژی ب هەموو شێوەیەكی بۆ قوتابی و مامۆستایێن چاڤدێر قەدەغەیە».
پەیمان خەواجە گۆت ژی: «رێكارێن دژوار بۆ چاڤدێریا هۆلێن ئەزموونان هەنە و ب هووری دێ چاڤدێریا هۆلێن ئەزموونان هێتە كرن، هەروەسا نابیت چو قوتابیەك بزاڤێن قوپیایێ بكەت، ژ بەركو رێكارێن توند هەنە، ئیلا موعجیزەبیت هەكە كەس ل قۆپیاكرنێ دەرباز نابیت، بێگومان هەر زێدەگاڤیەك ژی بهێتە تۆماركرن، دێ پێرابوونێن قانوونی هەمبەر هێنە وەرگرتن».
ژ لایەكێ دیڤە سامان مستەفا مەحموود، هاریكارێ رێڤەبەرێ گشتیێ پەروەردێ بۆ كاروبارێن تەكنیكی ل دهۆكێ، بۆ رۆژناما ئەڤرۆ گۆت: «ل سەرانسەری پارێزگەها دهۆكێ ژی 27 هزار و 266 قوتابی دێ پشكدارییێ د ئەزموونێن پۆلا 12 ئامادەیی دا ل 477 هۆلێن ئەزموونان كەن».
