ب گوژمێ نێزیكی دو ملیار دیناران پڕۆژەیێ دادگەها ئامێدیێ دهێتە بجهئینان
ئامێدیێ، مەحمود نهێلی:
ل سەر فەرمانا جەنابێ سەرۆك بارزانی و پشتی سەرەدانا جەنابێ وی بۆ دەڤەرێ، دەست ب چێكرنا ئاڤاهیەكی بۆ دادگەها بەرایی یا ئامێدیێ هاتە كرن، نوكە كار كرن تێدا بەردەوامە و رێژەیا پتر ژ 80% كار تێدا ب دووماهی هاتیە.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیار كر، پشتی سەرەدانا جەنابێ سەرۆك بارزانی و ل سەر داخوازییا وەلاتیێن دەڤەرێ دەست ب چێكرنا ئاڤاهیێ دادگەها ئامێدیێ هاتە كرن و گۆت: «كاركرن تێدا بەردەوامە، لێ ژ بەر رەوشا دارایی كار بلەز تێدا ناهێتە كرن، نوكە گەهشتیە قووناغێن دووماهیێ«.
گۆت ژی: «پڕۆژە ب گوژمێ ئێك ملیار و 700 ملیۆن دیناران ل سەر بودجا پارێزگەها دهوكێ و ب كوالیتیەكا باش دهێتە بجهئینان، بڕیارە د دەمەكێ نێزیك دا ئەڤ ئاڤاهیە ب دووماهی بهێت و بكەڤیتە د خزمەتا خەلكێ دەڤەرێ و دادگەها ئامێدیێ دا».
