ب گوژمێ پتر ژ سێ ملیار دیناران پڕۆژەیێ ئاڤـا خانكـێ هاتیە بجهئینان
زنار تۆڤی:
حوكمەتا هەرێما كوردستانێ تەمامبوونا پڕۆژەیەكێ ستراتیژی یێ ئاڤێ ل سنۆرێ ناوچەداریا خانكێ ڕاگەهاند، كو ب گوژمێ سێ ملیار و 500 ملیۆن دیناران هاتیە بجهئینان، ئەڤ پڕۆژە دێ كێشەیا كێمئاڤییێ ل دەڤەرێ بنبڕ كەت و د قووناغا داهاتی دا دێ ئاڤا پاقژ بۆ چەندین ناوچەداری و دەڤەرداریێن دی یێن دەوروبەر دابین كەت.
فەرمانگەها میدیا و زانیاری یا حوكمەتا هەرێما كوردستانێ راگەهاند، پڕۆژەیێ ئاڤا ناوچەداریا خانكێ، كو لسەر بەنداڤا مووسلێ هاتیە بجهئینان، ب ڕێژەیا 100% كارێن وی ب دووماهی هاتینە و كەفتیە د بنەجهكرنێ دا.
ئەڤ پڕۆژە، ب گوژمێ سێ ملیار و 500 ملیۆن دیناران هاتیە بجهئینان، شیان هەنە د هەر دەمژمێرەكێ دا سێ هزار و 400 مەترێن سێجا یێن ئاڤا پاقژ و ساخلەم بەرهەم بینیت، ئەڤە ژی دێ بیتە ئەگەرێ دووماهی ئینانێ ب كێمیا بێئاڤییێ ل دەڤەرا خانكێ.
هەروەسا د قووناغا دووێ یا ڤی پڕۆژەیی دا، ئاڤا پاقژ دێ گەهیتە دەڤەرێن (سێمێل، تەناهی و مسێریكێ)، ب ڤێ چەندێ ژی ڕێژەكا زێدەتر یا وەلاتیێن سنۆرێ دەڤەرداریا سێمێلێ دێ ژ ئاڤا پاقژ یا نیشتمانی مفادار بن.
ئەڤ پڕۆژە د چارچوڤێ بزاڤێن كابینا نەهێ یا حوكمەتا هەرێما كوردستانێ دایە بۆ پێشڤەبرنا ژێرخانا ئاڤێ و گەهاندنا خزمەتگوزاریێن سەرەكی بۆ هەموو دەڤەرێن جودایێن كوردستانێ.
