ب گوژمێ پتر ژ چار ملیار دیناران كار ل سەر پڕۆژەیێن رێك و پران ل تەناهیێ بەردەوامە
دهۆك، دلۆڤان ئاكرەیی:
سەرپەرشتیارێ پڕۆژەیێ جادەیا 60 مەتری یا سەنتەرێ ناوچەداریا تەناهیێ یا سەر ب دەڤەرداریا سێمێلێ ڤە دیاركر، كار ل سەر ڤی پڕۆژەی بەردەوامە و ئەڤ جادەیە دێ خزمەتەكا مەزن پێشكێشی زێدەتری دو هزار ئاكنجیێن دەڤەرێ و گوندێن دەوروبەر كەت، د هەمان دەم دا، كار ل سەر جادەیا 30 مەتری ژی یا گوندێ كێڤلا دهێتە كرن، دا كو ببیتە جۆتساید و ب تەمامی بهێتە نووژەنكرن.
ئەندازیار حەمید، سەرپەرشتیارێ پڕۆژەی بۆ رۆژنامەیا ئەڤرۆ گۆت: «ئەڤ جادەیە وەكو شاهـ دەمارەكا سەرەكی یا هاتنوچوونێ دهێتە نیاسین، چونكو ناوچەداریا تەناهیێ ب دەڤەرداریا سێمێلێ و رێیا نێڤدەولەتی یا زاخۆ ڤە گرێ ددەت، پڕۆژە ب دیزاینەكا سەردەمیانە دهێتە چێكرن، هندەك ئاڤكێشێن مەزن یێن ئاڤڕێژیێ تێدا هاتینە دانان، دا كو ل وەرزێ بارانێ بەرگریێ ل لەهیان بكەن و چو ئاریشە بۆ هاتنوچوونا وەلاتییان دروست نەبن».
ناڤبری باس ل تایبەتمەندیێن پڕۆژەی كر و گۆت: «پڕۆژە ب درێژاهیا هزار و 400 مەتران و ب گوژمێ چار ملیار و 350 ملیۆن دیناران دهێتە بجهئینان و ئارمانج ژێ گەشەكرنا ژێرخانا ئابووری و خزمەتكرنا گشتی یا خەلكێ دەڤەرێ یە».
