ب گوژمێ 350 ملیۆن دۆلاران پڕۆژەیێ ئاكرێ ڤیۆ دهێتە بجهئینان
رەمەزان زەكەریا:
ب گوژمێ 350 ملیۆن دۆلاران و ل سەر ڕووبەرێ 446 دۆنەمێن ئەردی، پڕۆژەیێ ستراتیژی یێ ئاكرێ ڤیۆ ل سەنتەرێ ئاكرێ دهێتە بجهئینان و ب سەدان دەلیڤەیێن كاری بۆ وەلاتیان پەیدا كەت.
ئەندازیار كۆڤان جەلال جەمیل، سەرپەرشتیارێ پڕۆژەی بۆ دەزگەهێن راگەهاندنێ گۆت: «پڕۆژەیێ ئاكرێ ڤیۆ، ژ چەندین هۆتێلێن ئێك، دو و پێنج ستێر، مۆتێل، خوارنگەه، بازارێن مەزن، باژێڕێن یاریان، پاركا ئاڤی، دەریاچە و پۆندێن چێكری، جهێن گشتی یێن بێهنڤەدانێ، هۆلێن بیرەوەریان، یاریگەها گۆلفێ و چەندین پشكێن دی پێك دهێت، كو دێ سیمایەكێ مۆدێرن و نوو دەتە ئاكرێ، د هەمان دەم دا ژ ڕوویێ بازرگانی و ئابووری ڤە، دەڤەرداریا ئاكرێ دێ ڤەژینیتەڤە و گەشەكرنەكا بەرچاڤ دێ ئێخیتە د ناڤ باژێڕی دا».
ناڤبری گۆت ژی: «پشكەكا گرنگ ژ پڕۆژەی ئەوە، ب سەدان دەلیڤەیێن كاری دێ بۆ خەلكێ ئاكرێ پەیدا كەت، ئەو كەسێن نوكە كار ل سەر پڕۆژەی دكەن ژ دارتاشی بگرە هەتا ئەندازیاری هەموو دەستێ كاری یێ خۆمالی نە و دەلیڤەیا كاری بۆ ب سەدان كەسان ل ئاكرێ هاتیە دابینكرن».
ئەمین سەلیم، ڕێڤەبەرێ گەشتوگوزارا ئاكرێ گۆت: «ب ڤی پڕۆژەی ئاڕێشەیا نەبوونا جهێن بێهنڤەدانێ دێ هێتە چارەسەركرن و نێزیكی دو هەتا دو هزار و 500 كەس دێ شێن مفای ژێ وەرگرن».
