تارق سەعید: یاریزانێن مە هەڤڕكییا پیشەكاران كرن و دەست ژ ناسناڤی بەرنادەین
قەیس وەیس:
د دیدارەكا كورت دا ڕاهێنەرێ تیما یانەیا دهۆك و هەلبژارتیێ ئیراقێ دیار كر بۆ وەرزێ 2025ێ دێ كاروانێ وان د قارەمانییا ئیراقێ دا یا درێژە و یاریزانێن وان هەڤڕكییا پیشەكارێن دەرڤەیی ئیراقێ دكرن.
زێدەتر تارق سەعید گۆت: بۆ وەرزێ نوو مە پشكداری ل سەر ئاستێ لاوان و پەجكەشێران كرییە، قارەمانییا ئیراقێ ل سەر چار قۆناغا بۆ چار پارێزگەهێن ئیراقێ و كوردستانێ هاتینە بەلاڤكرن، تیما مە یا لاوان هەڤڕكەكا سەرخستە و بەردەوام رێزێن ئێكێ و دویێ دهێت،د قۆناغا ئێكێ یا ئەڤ سالە دا سەرباری مە هیڤی هەبوونا ناسناڤێ وێ ب دەستڤە بینن لێ ژبەركو ئەو تیما رێزا ئێكێ هاتی پیشەكارێن وەلاتێ ئیرانێ ل سەر تیما خوە زێدەكربوو، لەوما ژی یاریزانێن مە هەڤڕكییا پیشەكاران دكر ب تنێ 22 چركە دناڤبەرا تیما مە و یا سیناعە دا جوداهی هەبوو، ئەڤەژی بۆ مە باشە و هیڤیێن ناسناڤێ هێشتا یێن مایین، مە سێ قۆناغ ماینە و گەشبینن دێ گەهینە ئارمانجا خوە و دەست ژ هەڤڕكیێ بەرنادەین.
هەروەسان ناڤهاتی گۆت: بۆ ئاستێ پەچكەشێران بۆ 24كم یاریزانێ مە عەبدولرەحمان شیڤان ئەكرەم رێزا ئێكێ هات بۆ ماوەیێ 33 خولەك و 39 چركە كۆمڤەكرن بوو قارەمان، ل سەر ئاستێ لاوان هەڤڕكییەكا دژوار دناڤبەرا مە و سیناعە، حدبا و هەولێر دهاتەكرن، مە پشت گەرمیی ب یاریزانێن خوە كربوو هەر ئێك ژ یوسف جیهاد، محەمەد سادق نوری، ئیهاب عومەر، ئارام سەباح، ئاڤەند هشیار فەریق و عیسام عەلی.
تارق سەعید ئەوچەندە ژی دیاركر هێشتا سێ قۆناغ ماینە و دێ هەموو بزاڤان كەن ب بەرنامە و پلانێن تایبەت باشتر خوە بەرهەڤبكەن و دوبارە ناسناڤێ ل سەر ئاستێ لاوان و ئەڤ سالە ل سەر ئاستێ پەچكەشێران بۆ دهۆكێ ڤەگەرینن.
