ترۆمبێلێن بێ تابلۆ دێ هێنه سزدان
هه‌ولێر، قائید میرۆ:
به‌رپرسه‌كێ وه‌زاره‌تا ناڤخوه ئاشكرا كر، نابیت ترۆمبێلێن بێ تابلۆ زێده‌گاڤیان بكه‌ن و هه‌ر ده‌مێ ژ لایێ پۆلیسێن هاتنوچوونێ ڤه بهێنه گرتن، ل گوره‌ی قانوونێ دێ هێنه سزادان و دبێژیت: هه‌كه ئه‌و ترۆمبێل ل كامیره‌یێن له‌زاتیێ ژی بده‌ن، دێ هێنه سزادان.
دكتۆر هێمن میرانی، رێڤه‌به‌رێ گشتیێ دیوانا وه‌زاره‌تا ناڤخوه بۆ رۆژناما ئه‌ڤرۆ دیار كر، هه‌ژماره‌كا زۆرا تڕۆمبێلێن بێ سالنامه ل هه‌رێما كوردستانێ هه‌نه و ل رێڤه‌به‌ریێن هاتنوچوونا هه‌رێما كوردستانێ نه‌هاتینه تۆماركرن و گۆت: “هه‌ر ده‌مێ ئه‌و ترۆمبێل بكه‌ڤنه مه‌فره‌زه‌یێن پۆلیسێن هاتنوچوونێ پێڕابوونێن قانوون هه‌مبه‌ر دێ هێنه وه‌رگرتن، چونكی نابیت تڕۆمبێل بێی تۆماركرن هاتنوچوونێ بكه‌ن، هه‌روه‌سا د ده‌مێ ئه‌نجامدانا هه‌ر زێده‌گاڤیه‌كێ ژ لایێ وان كه‌سێن ئه‌ڤان جۆرێن تڕۆمبێلان ب كار دئینن دێ هێنه غرامه‌كرن و سزایێن خوه هه‌نه”.
دكتۆر هێمن میرانی گۆتژی: “ل چه‌ند رۆژێن بۆری ل سۆران و دهۆكێ هه‌ژماره‌كا زۆرا وان ترۆمبێلان هاتینه سزادان، ئه‌گه‌ر بهێت و ده‌ستكاریا تابلۆیێن وان بهێته كرن یان ژی تابلۆیێن سه‌خته بكار بینن، وی ده‌می سزایێن دژوار دێ بۆ هه‌بن و دێ ده‌نه دادگه‌هێ، هه‌روه‌سا ل كامیره‌یێن له‌زاتیێ ژی ده‌مێ زێده‌گاڤیان دكه‌ن و پێگیریێ ب رێنمایێن هاتنوچوونێ نه‌كه‌ن، بێگومان لێپرسین د گه‌ل دا دێ هێته كرن”.
