ترێند
سیلاڤ بازێركی
ئەڤرۆ جڤاك پتر ژیا پێدڤی گرنگیێ ب ترێندان ددەت ئەڤجا چ ترێندێن مۆزیك و سترانان بن، یان خوارن و شریناهی بن، یان جۆرە سەمایەك بیت، ئێكا هند ژمە چێدكەت د هەر بابەتەكی دا چاڤ گرتی ببینە كۆپیەك ژ ڕەفتارا وان كەسێن بەری مە ترێند ئەنجام داین، هەتا وی ڕاددەی دێ بینی پەرتووكەك ژی یا دبیتە ترێند، لێ چونكی ترێندە ماوەیەكێ كورت دێ زۆر بەرنیاس بیت و ب شێوەیەكێ بەردەوام دێ دەستخۆشی ل نڤیسەری هێتەكرن، لێ بۆ ماوەیەكێ درێژ پەرتووك ناژیت، دبیت كەسەكێ نە خواندەڤانێ پەرتووكا بیت لێ چنكو پەرتووكێ ریكلامەكا باش یا بۆ هاتیەكرن ژ لایێ كەسێن بەرنیاس ڤە دبیت ئەڤ كەسە كەسێن بێ بنەما بن د ناڤ جڤاكی دا و چ ژ خواندنا پەرتووكان نەزانن، بتنێ كارێ وان چێكرنا ریكلامایە و ئەم وەكی خەلك بەرهەمی دكڕین نە ل دووف كوالێتیا بەرهەمی بەلكو ل دووف كوالێتیا ریكلاما بەرهەمی، ئەڤجا ب ئەگەرێ ریكلامەكا باش یان چاڤلێكرنێ دناڤ خەلكی دا پەرتووك دێ بیتە ترێند تۆ ژی یی ئامادەی وێ پەرتووكێ بكڕی بۆ گرتنا چەند وێنەیەكان دا خەلك بزانن تە ژی ئەڤ پەرتووكە یا هەی، پاشی دێ توز د دولابێ دا پەرتووكێ گریت، بێی كو كەسەكی كورتیەك یان بوچوونەك یان ڕەخنەیەك ل سەر ناڤەرۆكا پەرتووكێ دابیت.
ئەڤجا تۆ یێ نڤیسەر ل جهێ ڕیكلامێ بۆ بەرهەمێ خوە بكەی داكو پتر بەرنیاس ببیت، بهێلە خواندەڤان بڕیارێ بدەت ب دیتنا ناڤ و بەرگێ پەرتووكێ دێ گەلەك دەست خۆشیا بۆتە ئینیت، لێ هەكە خواندەڤانەكی ب دروستی خواند كورتی و بوچوون و ڕەخنێن وی/ێ دێ تە گەلەك زەنگینتر لێكەن، ئەڤجا هنگی ژ بەرهەمێ خوە بترسە هەكە بتنێ دەستخۆشی بۆ تە هاتن و بزانە خواندەڤان ب دروستی نە كەفتیە بەر خواندنێ.
