ته‌له‌فزیۆنا دهۆك دراما (كۆمێنت) بۆ هه‌یڤا ره‌مه‌زانێ چێكریه
دهۆك، شاكر ئه‌تروشی:
ب پشته‌ڤانیا ناڤه‌ندا خانی یا ره‌وشه‌نبیری و راگه‌هاندنێ، ته‌له‌فزیۆنا دهۆك درامایه‌كا پێنج خه‌له‌كی بۆ هه‌یڤا ره‌مه‌زانێ چێكریه و ده‌مێ هه‌ر خه‌له‌كه‌كێ دناڤبه‌را پازده هه‌تا هه‌ژده خۆله‌كان دایه و د پلانا ته‌له‌ڤژیۆنێ دایه چه‌ند خه‌له‌كێن دی ژی وێنه بكه‌ن.
بێوار بداخ، ده‌رهێنه‌رێ وێ درامایێ بۆ ئه‌ڤرۆ گۆت: ژبه‌ركو ته‌له‌فزیۆنا دهۆك نه‌ڤیا بۆ هه‌یڤا ره‌مه‌زانێ بێنه‌رێن خوه ژ به‌رهه‌مێن خۆمالی بێ به‌هر كه‌ت، له‌ورا ئه‌ڤ كاره هاته‌كرن و دراما مه ب ناڤێ (كۆمێنت) ه، ژ نڤیسینا (عادل عه‌بدولمه‌جید) ه، پێنج خه‌له‌كه ب دووماهی هاتینه و د شه‌ڤێن ره‌مه‌زانێ دا دێ ل سه‌ر شاشا دهۆك تیڤی هێته نیشادان، هژماره‌كا ئه‌كته‌رێن به‌رنیاس دڤێ درامایێ دا د پشكدارن، ژوانا ( جه‌میل زكری، شێروان جه‌میل، ماجد محه‌مه‌د وه‌یسی، حه‌یده‌ر بامه‌رنی، سیروان گۆیی) و گه‌له‌كێن دی ژی، بۆ جارا ئێكێ ژی دو كچ ب ناڤێن (له‌یلا سه‌لمان و دوعا هه‌جه‌ر) كو نوكه قوتابیێن په‌یمانگه‌ها هونه‌رێن جوانن ل دهۆكێ دڤێ درامایێ د پشكدارن.
هه‌روه‌سا گۆت: ناڤه‌رۆكا هه‌ر خه‌له‌كه‌كێ بابه‌ته‌كێ جودایه، ئانكو چو گرێدان پێكڤه نینن، ئه‌حمه‌د سه‌بری ب كارێ وێنه‌كرنێ رابوویه، رێڤه‌به‌رێ به‌رهه‌می ژی ماموستا (خۆشناڤ جه‌میل) دیمه‌نێن درامایێ ژی ل دهۆك و ده‌وروبه‌ران هاتیه تۆماركرن، بۆ زانین نوكه هژماره‌كا دی یا نڤیسین و سیناریۆیان ل به‌ر ده‌ستن و د به‌رنامێ ته‌له‌فزیۆنێ دا هنده‌ك خه‌له‌كێن دی ژی چێكه‌ن.
