تورکیا: ئارمانجا ئێرشان تنێ ئیران نینە
هاکان فیدان وەزیرێ دەرڤە یێ تورکیا دیار کر، ئەو ب تەمامی پشتەڤانیێ ل بزاڤێن پاکستانێ بۆ ئاشتیێ و راگرتنا شەڕێ د ناڤبەرا ئیرانێ ل گەل ئەمریکا و ئسرائیلێ دا دکەن و هەتا نها ژی بەرپرسێن پاکستانێ خەباتەک گەلەک مەزن کرینە و ئەو یەک ژی جهێ دەستخوەشیێ یە و وەکو تورکیا وان دڤێت پرسێن هەی ب رێیا دانوستاندنان بهێنە چارەسەرکرن.
ناڤهاتی ئەو یەک ژی دیار کر، ئارمانجا ئێرشان تنێ ئیرانێ نینە، ئسرائیل یێ کار بۆ گوهۆڕینا نەخشێ رۆژهەلاتا ناڤین دکەت و ئەو یەک دێ بیتە ئەگەرێ ئالۆزیێن گەلەک مەزن، بەری نها ژی وەکو تورکیا وان هۆشداری داینە کو هەر بزاڤەکا ئسرائیلێ بۆ ئالۆزکرنا رەوشا دەڤەرێ دێ کاریگەریا خوە ل هەموو وەلاتێن رۆژهەلاتا ناڤین کەت، ژ بەر ڤێ یەکێ ژی تورکیا پشتەڤانیێ ل شەڕی ناکەت و هەکە شەڕەک نوو دەستپێ بکەت دێ کاریگەریا خوە ل هەموو وەلاتێن رۆژهەلاتا ناڤین کەت.
