تەحسین تەها ب نۆتەکرنا 74 سترانان دچیتە د ناڤ پرتووکخانەیا کوردی دا
هەرهین محەمەد:
د بزاڤەکا بەردەوام دا بۆ زەنگینکرن و پاراستنا ئەرشیفێ هونەرێ کوردی، و د ناڤ تاقیگەها داهێنانێن موزیکێ دا، کارێن مەزن بۆ نووکرن و تۆمارکرنا چەندین بەرهەمێن سترانبێژێن ناڤدارێن کوردستانێ دهێنە ئەنجامدان ل لایەکێ دی ژی، پێنگاڤەکا مێژوویی بۆ نۆتەکرنا سترانێن ستێرا گەش یا ئاسمانێ موزیکا کوردی، هونەرمەندێ نەمر (تەحسین تەها)، دەکەڤێتە د خزمەتا حەژێکەر و قوتابیێن زانستێ موزیکێ دا.
هونەرمەندێ موزیکژەن جێهگر ئەنەس ددیدارەکێ دا بۆ بەرپەڕێ هونەری یێ ڕۆژنامەیا ئەڤرۆ گۆت: پشتی داخازا نڤیسەر (ڕێکێش ئامێدی) بۆ دەوڵەمەندکرنا چاپا سێیێ یا پرتووکا خوە یا تایبەت ب ژیان و سترانێن هونەرمەندێ نەمر (تەحسین تەها)، کار ل سەر نۆتەکرنا 74 سترانێن ڤی هونەرمەندی هاتیە کرن. ئەڤ پرتووکە نوکە ل پەرتووکخانان یا بەردەستە و دشێت ببیتە مفایەکێ مەزن بۆ هەمی سترانبێژ و موزیکژەنێن ناوخۆیی و دەرەکی و ژێدەرەکێ زانستی یێ باوەرپێکری بۆ قوتابیێن ماستەر و دکتۆرایێ د بوارێ موزیکێ دا و من ئەڤ خزمەتە بۆ هونەرێ ڤی هونەرمەندی کر، نە وەک کوڕێ باژێڕێ من بەلکو وەک ستێرەکا مەزن د ئاسمانێ هونەرێ کوردی دا. ئەڤ کارە نیەتێ ناگۆهۆڕیت، بەلێ ڕێکێ بۆ هەر ژەنیارەکێ نۆتەزان ب ساناهی دکەت کو ڤان سترانان بژەنیت.
ناڤبری گۆتژی: پرۆسێسا نۆتەکرنێ کارەکێ ب ساناهی نەبوو؛ د دەستپێکێ دا هزر دهاتەکرن کو دێ د ناڤبەرا 15 هەتا 20 ڕۆژان دا ب دووماهی هێت، بەلێ قووڵبوونا د ناڤ ئاوازێن تەحسین تەهایی دا بوو ئەگەرێ 4 هەتا 6 مەهێن کارێ بەردەوام.موزیکژەنی ئاماژە ب هندێ کر کو ستران بۆ سترانێ دیار بوو کو هونەرمەندێ ناڤبری کارێن خۆ گەلەک ب ڕێک و پێکی و ب شێوەکێ زانستی دارشتینە، کو ئەڤە ژی جهێ سەرسوڕمانێ یە چونکی بسپۆڕیا هونەرمەند تەحسین تەها (شانۆ) بوو نەک موزیک، و وی پشتبەستن ل سەر گوهـ و گێولێ خۆ یێ بلند گرتبوو.
ل دۆر نووترین کارێن خوە یێن هونەری ناڤهاتی گۆت: نوکە مژوولی دوو ئەلبومێن رێکێش سەیرانی و ئەلبۆمەکا مێهڤان ئەلکیشکی مە رابوویمە ب کارێ ئەرێنج و ریکوردا وان و نوکە د قوناغێن دووماهیێ دانە ل نێزیک دێ کەڤنە بەر دەستێن گوهدار و حەژێکەرێن وان
وەک سترانێن تەک تەک ژی نوکە سێ هەتا چار سترانێن هونەرمەند محەمەد تاها ئاکرەیی ل بەر دەستێن منن و کار ل سەر دکەم و هەردیسان دوو سترانێن هونەرمەند بزاڤ زاخویی ژی ل بەر دەستێ منن و کار ل سەر دکەم و سترانا ئاخ و برین یا هونەرمەند کمال محمد کار ل سەر نوی کرنا وێ دکەم کو دێ ب دەنگێ هونەرمەند فەرسەت حسێنی هێتە بەلاڤ کرن.
جێهگری ل دووماهیێ گوت ژی: پرتووکخانێن کوردی گەلەک د بێ بەهرن ژ پەرتووکێن نۆتە و زانستێ موزیکێ.
ئەڤ کارە تێچوویەکێ مەزن دڤێت، لەورا پێدڤی یە جهێن شۆڵەژێ و پەیوەندیدار مەزاختیێن ڤان پرۆژان دابین بکەن و ئەگەر جهەک خوە ل ڤان پرۆژان بکەتە خودان، ئەز یێ ئامادەمە بێی دوودلی سترانێن بەهرا پتر ژ سترانبێژێن کورد و میلۆدیێن فۆلکلۆری کەمە پرتووک وەک پەیڤ و ئاواز (نۆتە)، بۆ پاراستنا ڕەسەناتیا مۆزیکا کوردی.»
