جوان عه‌بدولا: نابیت هیچ قانوونه‌ك ل ئیراقێ بێی رازیبوونا ئالیێن هه‌ڤپه‌یمانیا بڕێڤه‌برنا ده‌وله‌تی بهێته ده‌ركرن
هه‌ولێر، قائید میرۆ
پارتی دیموكراتی كوردستان دگه‌ل هژماره‌كا ئالیێن سیاسی یێن ئیراقی هه‌ڤپه‌یمانیه‌كا نوو بناڤێ بڕێڤه‌برنا ده‌وله‌تێ پێكئینایه و په‌رله‌مانتاره‌كا پارتی ژی دبێژیت، پارتی ب چه‌ند مه‌رجه‌كان پشكداری ڤێ هه‌ڤپه‌یمانیێ بوویه و نابیت هیچ قانوونه‌ك بێی رازیبوونا ڤان ئالیێن دناڤا ڤێ هه‌ڤپه‌یمانیێ دا ژ جڤاتا نوونه‌رێن ئیراقی بهێته ده‌ركرن، هه‌روه‌سا جڤاته‌كا ئێكگرتی دێ ل ئیراقی هێته پێكئینان و هه‌رێما كوردستانێ ژی دێ نوونه‌ر تێدا هه‌بن.
جوان عه‌بدولا، ئه‌نداما جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان بۆ رۆژناما (ئه‌ڤرۆ) گوت” هه‌ڤپه‌یمانیا بڕێڤه‌برنا ده‌وله‌تێ رێككه‌فتنامه‌كا سیاسی یا نوویه، هه‌ژماره‌كا هێزێن سیاسی ژی تێدا پشكدارن ژوان ژی چارچۆڤه‌یێ هه‌ماهه‌نگیێ و بابیلۆن و هه‌ڤپه‌یمانیا سیاده و عه‌زم و پارتی و ئێكه‌تی و هه‌ژماره‌كا په‌رله‌مانتارێن سه‌ربخوه، مه‌ره‌م ژ پێكئینانا ڤێ هه‌ڤپه‌یمانیێ ئه‌وه جڤاتا نوونه‌رێن ئیراقێ بهێته كاراكرن، هه‌تا بشێت كارێن خوه یێن قانوونی و دستووری بڕێڤه‌ببه‌ت، هه‌روه‌سا پێكئینانا حوكمه‌تا نوو یا ئیراقی، هه‌تا ره‌وشا ئالۆزا نوكه یا ئیراق تێدا دبۆریت دبیت بهێته ده‌ربازكرن و هه‌موو ئالیێن دناڤا ڤێ هه‌ڤپه‌یمانیێ رێككه‌فتینه حوكمه‌ته‌ك ل ئیراقی بهێته پێكئینان بشێت خزمه‌تگوزاریان پێشكێشی خه‌لكێ ئیراقی بكه‌ت و ببنه جهێ باوه‌ریا وی خه‌لكی”.
جوانێ گوت ژی” پارتی دیموكراتی كوردستان به‌رده‌وام بزاڤ كرینه ئالیێن ئیراقی بگه‌هنه رێككه‌فتنێ و ئیراق ته‌ناهیێ بخوه‌ڤه ببینیت، پارتی وه‌سا هزركریه ڤێ قۆناغێ بچیته دناڤا ڤێ هه‌ڤپه‌یمانیێ دا بۆ وێ چه‌ندێ سه‌قامگیری بۆ ئیراقی ڤه‌گه‌ڕیت و ره‌وش ئالۆزتر نه‌بیت، هه‌ر ژده‌ستپێكا پرۆسه‌یا سیاسی ل ئیراقی پشتی سالا ٢٠٠٣ێ هه‌لویستێ پارتی یێ دیاربوویه ل ئیراقی ئه‌وژی بجهئینانا دستوورێ ئیراقی یه، چونكه هه‌كه دستوور بهێته بجهئینان چو ئاریشه‌یێن وه‌سا نامینن د ناڤبه‌را ئالیێن ئیراقی، ئه‌وژی ب رێیا بجهئینانا بنه‌مایێن لهه‌ڤهاتنێ و هه‌ڤپشكیێ و یه‌كسانیێ”.
هه‌روه‌سا خویاكر” پارتی ب مه‌رجه‌كی پشكداری د هه‌ڤپه‌یمانیا نوو دا كریه ئه‌وژی رێككه‌فتن هه‌بیت د ناڤبه‌را ئالیێن پشكدار د ڤێ هه‌ڤپه‌یمانیێ دا ئه‌وژی ده‌ركرنا بڕیارێن گرنگ ب هه‌ڤڕا بهێنه دان و قانوونێن گرنگ پێكڤه بهێنه ده‌ركرن و هه‌ماهه‌نگی هه‌بیت د ناڤبه‌را وان ئالیێن پشكدار، پارتی وه‌كو پشكدار چوویه د ناڤا هه‌ڤپه‌یمانیێ دا ئانكو دڤێت پشكداربیت د ده‌ركرنا بڕیاران دا و تنێ پشكداری نینه به‌لكو هه‌موو پرۆسه‌یێن ده‌ركرنا بڕیاران و په‌سه‌ندكرنا قانوونان و بجهئینانا وان ژی پارتی پشكدار بیت، پارتی زۆر ته‌كه‌ست لسه‌ر هنده‌ك بابه‌تێن گرنگ كریه ژوان ژی ده‌زگه‌هێن ئه‌منی و ئابوری و ره‌وشا پێشمه‌رگه و بجهئینانا مادێ ١٤٠ یێ دستووری، پرسێن بڕێڤه‌برنا كه‌ركووكێ و ده‌ركرنا قانوونا په‌ترۆل و غازێ د ده‌مێ شه‌ش هه‌یڤاندا، هه‌روه‌سا به‌لاڤكرنا داهاتێ په‌ترۆل و غازێ بشێوه‌یه‌كێ یه‌كسان، خالا گرنگ ژی ئه‌وه جڤاته‌كا ئێكگرتی دێ ل ئیراقی هێته پێكئینان و مافێ هه‌موو پێكهاته‌یێن ئیراقی دێ هێته پاراستن، هه‌رێما كوردستانێ ژی دێ نوونه‌ر هه‌بیت د ناڤا ڤی جڤاتێ دا و هه‌موو مافێن هه‌رێما كوردستانێ دێ دپاراستی بن، پارتی پێداگیری كریه كو نابیت هیچ قانوونه‌ك ل جڤاتا نوونه‌ران بهێته ده‌ركرن بێی هه‌بوونا رێككه‌فتنا هه‌موو ئالیێن پشكدار”.
