جوتیار عادل:د به‌رهه‌ڤین هه‌ر ده‌مێ پێدڤی بكه‌ت سه‌ره‌دانا به‌غدا بكه‌ین
ئه‌ڤرۆ:
حوكمه‌تا هه‌رێما كوردستانێ به‌رهه‌ڤی د دارێشتنا پرۆژه‌یێ قانوونا بودجه‌یا گشتی یا ئیراقێ بۆ سالا 2023 یا هه‌ی و تێكگه‌هشتن د ناڤبه‌را هه‌ردو ئالیان بۆ دیاركرنا پشكا هه‌رێما كوردستانێ و چاره‌سه‌ركرنا كێشه‌یێن دارایی دناڤبه‌را وان دا یا هه‌ی.
جوتیار عادل، په‌یڤدارێ حوكمه‌تا هه‌رێما كوردستانێ، ڕاگه‌هاند” په‌یوه‌ندیێن كابینه‌یا نه‌هێ یا حوكمه‌تا هه‌رێما كوردستانێ ل گه‌ل حوكمه‌تا فیدرالی یا ئیراقی د به‌رده‌وامن و شاندێن هه‌رێما كوردستانێ چه‌ندین جاران سه‌ره‌دانا به‌غدا كریه و چه‌ندین لژنه بۆ كۆمه‌كا بابه‌تان وه‌كو پرۆژه‌یێ قانوونا بودجه‌یا گشتی یا ئیراقێ بۆ سالا 2023 و دۆَسێیا په‌ترۆلێ و چاڤدێریا دارایی یێن هاتینه پێكئینان و هه‌ماهه‌نگی د ناڤبه‌را دیوانا چاڤدێریا دارایی یا حوكمه‌تا هه‌رێما كوردستانێ و دیوانا چاڤدێریا دارایی یا حوكمه‌تا ئیراقێ دا هه‌یه”.
گوت ژی” دووماهی سه‌ره‌دانا شاندێ هه‌رێما كوردستانێ بۆ به‌غدا به‌ری سه‌رێ سالا نوو بوو و نوكه ژی د به‌رهه‌ڤین هه‌ر ده‌مێ پێدڤی بكه‌ت سه‌ره‌دانا به‌غدا بكه‌ین و چاڤه‌ڕێی وێ چه‌ندێ دكه‌ین ده‌مه‌ك بهێته دیاركرن كو پێكڤه كۆمبین و دانوستاندنێ ل سه‌ر وان بابه‌تێن گرنگ بكه‌ین یێن من ئاماژه پێ كری، ل گه‌ل كۆمه‌كا بابه‌تێن دی كو گرێدای ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ و بابه‌تێ پێشمه‌رگه‌ی. له‌وما ئه‌م وه‌كو حوكمه‌تا هه‌رێما كوردستانێ د به‌رهه‌ڤین هه‌ر ده‌مه‌كێ بهێته دیاركرین سه‌ره‌دانا به‌غدا بكه‌ین”.
