جڤاتا نوونه‌رێن ئه‌مریكا: دڤێت سه‌رۆك بایدن پشته‌ڤانیا له‌شكرێ توركیا نه‌كه‌ت
ب، سه‌رجان مه‌حمود:
50 ئه‌ندامێن جڤاتا نوونه‌رێن ئه‌مریكا نامه‌یه‌كا تایبه‌ت بۆ وه‌زیرێ به‌رگریێ یێ ئه‌مریكا شاندن و تێدا داخواز ژێ كرن كو سنۆره‌كێ بۆ بنپێكرنێن توركیا ل هه‌رێمێ دانێت و كه‌لوپه‌لێن سه‌ربازی یێن بۆ نووژه‌نكرنا فرۆكێن F16 نه‌ده‌ته توركیا و ئاشكرا كرن ده‌ستهه‌لاتا توركیا هه‌م ل ناڤخوه و هه‌م ژی ل ده‌رڤه ب سه‌رێ خوه بزاڤان دكه‌ت و گۆه ناده‌ته قانوونێن نێڤده‌وله‌تی و ژ به‌ر ڤێ یه‌كێ د هه‌ر واری دا ئالۆزیان دروست دكه‌ت و هه‌ڤكاری و هاریكاریێن سه‌ربازی یێن ئه‌مریكا بۆ مه‌ره‌مێن نه دروست بكار دئینیت و بۆ ڤێ چه‌ندێ دڤێت توركیا بهێته سزادان و ب چو ره‌نگه‌كێ ژی هاریكاریا وی وه‌لاتی نه‌هێته كرن.
نامه‌یا بۆ وه‌زیرێ به‌رگریێ ئه‌مریكا ب سه‌ركێشیا گوس بلیراكیس و فرانك پیلۆن ڤه هاتیه نڤیسین و 50 ئه‌ندامێن جڤاتا نوونه‌رێن ئه‌مریكا ئیمزا كرینه و د پشكه‌كا نامه‌یا ئه‌ندامێن جڤاتا نوونه‌ران دا هاتیه دیار كرن كو توركیا د قۆناغا نها دا داخوازا نووژه‌نكرنا فرۆكێن F16 و سارۆخ و كه‌لوپه‌لێن مۆدێرن یێن سه‌ربازیێ دكه‌ت و هه‌كه د ڤێ قۆناغێ دا ئه‌ڤ داخوازیێن توركیا بهێنه قه‌بوول كرن دێ بیته ئه‌گه‌ر كو ده‌ستهه‌لاتا توركیا زێده‌تر ببیته مه‌ترسی، بێگومان د ده‌مه‌كێ وه‌سا دا توركیا دێ ئاریشان بۆ وه‌لاتێن ده‌وروبه‌رێن خوه ژی دروست كه‌ت و بۆ ڤێ چه‌ندێ وه‌ك ئه‌ندامێن جڤاتا نوونه‌ران داخواز ژ وه‌زیرێ به‌رگریێ دكه‌ین كو ل هه‌مبه‌ر توركیا هه‌لوه‌سته‌كێ توند نیشا بده‌ت.
دهێته زانین كڕینا سارۆخێن S400 ژ رۆسیا و بزاڤێن توركیا یێن ل دژی هه‌ڤپه‌یمانێن ئه‌مریكا و بزاڤێن نه قانوونی یێن ل ده‌ریا سپی و ره‌وشا ناڤخوه‌یی یا توركیا بووینه ئه‌گه‌ر كو په‌یوه‌ندیێن د ناڤبه‌را ئه‌مریكا و توركیا دا گه‌له‌ك ئالۆز بووینه و به‌ری نامه‌یا ئه‌ندامێن جڤاتا نوونه‌رێن ئه‌مریكا، هژماره‌ك ئه‌ندامێن كۆنگرێسا ئه‌مریكا ژی داخواز ژ جۆ بایدن كربوون كو هه‌ڤكاریێن سه‌ربازی بۆ توركیا بهێنه راگرتن و فرۆكێن مۆدێرن یێن شه‌ری ژی نه‌ده‌نه توركیا و ئه‌ندامێن كۆنگرێسێ دیار ژی كربوون كو هه‌تا ئه‌مریكا سزایێن ئابووری، سیاسی و سه‌ربازی ل سه‌ر توركیا نه‌سه‌پینیت ده‌ستهه‌لاتا ئه‌ردۆغان بۆ راستكرنا سیاسه‌تا توركیا چو پێنگاڤه‌كێ ب كریاری ناهاڤێژیت، بۆ ڤێ چه‌ندێ ژ بایدن خوا‌ستبوون كو ده‌ستهه‌لاتا ئه‌ردۆغانی سزا بده‌ت.
