جێمز جێفری: ئه‌مریكا نه‌چاره پێگه‌هێ خوه ل باكورێ سووریێ بهێزتر بكه‌ت
ئه‌ڤرۆ:
نوونه‌رێ به‌رێ یێ سه‌رۆكێ ئه‌مریكا بۆ كاروبارێن سووریێ راگه‌هاند كو ئه‌مریكا ب چو ره‌نگه‌كێ هێزێن خوه ژ باكورێ سووریێ ڤه‌ناكێشیت و نها گوهۆرینێن مه‌زن ل ده‌ڤه‌رێ روو دده‌ن و ئه‌مریكا نه‌چاره پێگه‌هێ خوه ل باكورێ سووریێ بهێزتر ژی بكه‌ت.
نوونه‌رێ به‌رێ یێ سه‌رۆكێ ئه‌مریكا بۆ كاروبارێن سووریێ راگه‌هاند كو گه‌فێن توركیا یێن بۆ ده‌ستپێكرنا ئۆپه‌راسیۆنه‌كا نوو ل باكورێ سووریێ د به‌رژه‌وه‌ندیا چو ئالیه‌كێ دا نینه، ب تایبه‌تی ژی ئه‌مریكا و وه‌لاتێن هه‌ڤپه‌یمانێن شه‌رێ ل دژی داعشێ، چونكی هه‌ر ئۆپه‌راسیۆنه‌كا نوو یا توركیا ل باكورێ سووریێ دێ بیته ئه‌گه‌رێ ئالۆزیێن نوو بێگومان د ده‌مه‌كێ وه‌سا دا داعش دێ مفادار بیت و دێ شێت جاره‌كا دی خوه ب رێكخستن بكه‌ت و گۆت: (ژ به‌ر هندێ ژی هه‌تا نها ئه‌مریكا چه‌ندین جاران هۆشداری دایه توركیا كو ده‌ست ب چو ئۆپه‌راسیۆنێن نوو نه‌كه‌ت، بێگومان توركیا د بابه‌تێ مه‌ترسیێن ل سه‌ر ئاسایشا خوه دا یا مافداره لێ به‌ری نها ئه‌مریكا سۆز دایه توركیا كو رێ ناده‌ت باكورێ سووریێ ببیته گه‌ف ل سه‌ر توركیا و هه‌تا نها ژی ل باكورێ سووریێ چو چالاكی ل دژی توركیا نه‌هاتینه كرن).
ناڤهاتی سه‌باره‌ت ب په‌كه‌كێ ژی راگه‌هاند كو بێگومان په‌كه‌كه چه‌ند بۆ توركیا جهێ مه‌ترسیێ بیت وه‌سا بۆ ئه‌مریكا ژی جهێ مه‌ترسیێ یه، هێزێن سووریا دیموكرات هه‌ڤپه‌یمانێن ئه‌مریكا نه و د شه‌رێ ل دژی داعشێ دا وێ هێزێ سه‌لماند كو دشێت ئارامیا باكورێ سووریێ بپارێزیت، ژ به‌ر هندێ ژی ئه‌مریكا پشته‌ڤانیێ ل هێزێن سووریا دیموكرات دكه‌ت و د هه‌مان ده‌می دا ئه‌مریكا چه‌ندین جاران ژی دیار كریه كو ئه‌و چه‌كێن بۆ هێزێن سووریا دیموكرات دچن دێ بۆ شه‌رێ ل دژی داعشێ هێنه بكارئینان و هه‌تا نها ئه‌و چه‌ك نه‌كه‌فتینه ده‌ستێ په‌كه‌كێ و نابیت ژی بكه‌ڤنه ده‌ستێ وێ و گۆت: (هێشتا ژی داعش یا بهێزه و دشێت جاره‌كا دی ده‌ست ب كریارێن تیرۆرستی بكه‌ت، ژ به‌ر هندێ ژی نابیت ئۆپه‌راسیۆنا توركیا كاریگه‌ریا خوه ل شه‌رێ ل دژی داعشێ بكه‌ت، ژ به‌ر هندێ ژی ئه‌مریكا چه‌ندین جاران هۆشداری دایه توركیا كو ده‌ست ب چو ئۆپه‌راسیۆنێن نوو نه‌كه‌ت).
سه‌باره‌ت ب هندێ ئایا دێ ئه‌مریكا هێزێن خوه ژ باكورێ سووریێ ڤه‌كێشیت یان نه ژی نوونه‌رێ به‌رێ یێ سه‌رۆكێ ئه‌مریكا بۆ كاروبارێن سووریێ راگه‌هاند كو باكورێ سووریێ هه‌م بۆ ئه‌مریكا و هه‌م ژی بۆ ئارامیا هه‌موو سووریێ و رۆژهه‌لاتا ناڤین یا گرنگه، هێشتا ژی مه‌ترسیا داعشێ یا هه‌ی، هه‌تا ئه‌و مه‌ترسی ژی هه‌بیت ئه‌مریكا نه‌چاره كو پێگه‌هێ خوه ل باكورێ سووریێ بهێزتر لێ بكه‌ت و ئه‌و یه‌ك د به‌رژه‌وه‌ندیا هه‌موو وه‌لاتێن ده‌ڤه‌رێ دایه.
