جێگرێ ئه‌ردۆغانی:دبیت ئه‌م په‌یوه‌ندیێن خوه ل گه‌ل شامێ باش بكه‌ین
ئه‌ڤرۆ:
جێگرێ سه‌رۆكێ گشتی یێ ئاكپارتیێ راگه‌هاند كو نها وان ده‌ست ب قۆناغه‌كا نوو ل گه‌ل سووریێ كرینه و دبیت توركیا ده‌ست ب دانوستاندنان د ئاستێ بلند ژی ل گه‌ل شامێ دا بكه‌ت، چونكی یا د به‌رژه‌وه‌ندیا توركیا دا بیت دێ كه‌ین.
حه‌یاتی یازیجی جێگرێ سه‌رۆكێ گشتی یێ ئاكپارتیێ بۆ ده‌زگه‌هێن راگه‌هاندنا توركیا دیار كر كو رۆژهه‌لاتا ناڤین به‌ر ب گوهۆرینێن بله‌ز ڤه دچیت و بێگومان پێشبینی دهێته كرن كو ل سووریێ ژی گه‌له‌ك گوهۆرین روو بده‌ن، بێگومان دڤێت توركیا خوه بۆ هه‌ر گوهۆرینه‌كێ ل سووریێ به‌رهه‌ڤ بكه‌ت و گۆت: (ده‌مه‌كه گه‌له‌ك كه‌س به‌حسێ هندێ دكه‌ن كا ئایا توركیا دێ ده‌ست ب دانوستاندنان ل گه‌ل شامێ كه‌ت یان نه، ره‌نگه توركیا ده‌ست ب دانوستاندنان ل گه‌ل شامێ بكه‌ت و دبیت ئه‌و دانوستاندن د ئاستێ بلند دا ژی بن، چونكی هه‌ر تشتێ د به‌رژه‌وه‌ندیا توركیا دا بیت دێ هێته كرن).
ئه‌و یه‌ك د ده‌مه‌كێ دایه كو حه‌فتیا بۆری وه‌زیرێ ده‌رڤه یێ توركیا مه‌ولوود چاڤوش ئوغلۆ ژی راگه‌هاند كو وی هه‌ڤدیتنه‌كا كورت ل گه‌ل وه‌زیرێ ده‌رڤه یێ سووریێ كریه و هه‌روه‌سا دیار ژی كر كو ئه‌و وه‌كو توركیا دخوازن ئۆپۆزسیۆنا سووریێ و حوكمه‌تا وی وه‌لاتی ئاشت ببن و هه‌موو ئاریشێن هه‌ی د ناڤبه‌را خوه دا چاره‌سه‌ر بكه‌ن، پشتی داخۆیانیا وه‌زیرێ ده‌رڤه یێ توركیا ژی ل چه‌ندین ده‌ڤه‌رێن ل باكورێ سووریێ كو نها ل ژێر كۆنترۆلا توركیا دانه خوه‌نیشادان ل دژی توركیا هاتنه كرن و هنده‌ك ژ گرۆپێن چه‌كدارێن سووری ژی راگه‌هاندن كو توركیا خیانه‌تێ ل وان دكه‌ت و ئه‌و یه‌ك ژی ناهێته قه‌بوول كرن.
ل ئالیێ دی پشتی كو ره‌جه‌ب ته‌یب ئه‌ردۆغان ژ رۆسیا ڤه‌گه‌ری بۆ ده‌زگه‌هێن راگه‌هاندنا توركیا دیار كر كو نها ده‌زگه‌هێ هه‌والگریا توركیا ل گه‌ل ده‌زگه‌هێ هه‌والگریێ یێ سووریێ دانوستاندنان دكه‌ن و بۆ توركیا یا گرنگ ئه‌وه كو ل سووریێ ئه‌نجامه‌كا باش بده‌ستڤه بینیت.
د ڤێ ده‌ربارێ دا چاڤدێرێن سیاسی یێن توركیا ژی دیار دكه‌ن كو ستراتیژیا ئاكپارتیێ ل سووریێ تووشی شكه‌ستنێ هاتیه و توركیا نه‌شێت هه‌تا هه‌تای ل سووریێ بمینیت و نه‌چاره هێزێن خوه ڤه‌كێشیت، ژ به‌ر هندێ ژی نها توركیا ده‌ست ب ستراتیژیه‌كا نوو كریه، چونكی ئارمانجا سه‌ره‌كی یا توركیا ژ چوونا بۆ ناڤ ئاخا سووریێ بۆ هندێ بوویه دا نه‌هێلیت كورد ل سووریێ بگه‌هنه مافێن خوه، نها ژی توركیا دڤێت ل گه‌ل شامێ رێككه‌ڤیت و ل دژی كوردان ده‌ست ب پیلانه‌كا نوو بكه‌ن، هه‌كه پیلانا توركیا یا ل دژی كوردان بجه بهێت وی ده‌می پێدڤی ناكه‌ت كو هێزێن توركیا ل سووریێ بمینن و دێ توركیا بله‌ز هێزێن خوه ژ سووریێ ڤه‌كێشیت.
هه‌ژی ئاماژه‌پێدانێ یه دوهی هێزێن توركیا باژێرێ كۆبانێ و چه‌ندین گوندێن دی یێن رۆژئاڤایێ كوردستانێ تۆپباران كرن كو د ئه‌نجام دا زیان گه‌هشته مالێ خه‌لكی و چه‌ند وه‌لاتیێن سڤیل ژی بریندار بوون.
