جەلادێ زیندانـێ‌ گۆت، ئـەز چەند كێڤلان دانمە تـە، دێ هند پەرداغێن...

جەلادێ زیندانـێ‌ گۆت، ئـەز چەند كێڤلان دانمە تـە، دێ هند پەرداغێن ئاڤـێ‌ دەمە تە تۆ ڤەخۆی

10

سالار محەمەد دۆسكی:

1-8

زیندانیەكێ‌ سیاسی دیار دكەت، ل ژیێ‌ سنێلەیێ‌ دناڤ رێكخستنێن پارتی دیموكراتی كوردستان دا دهێتە رێكخستن و چەندین بزاڤ و چالاكیێن نهێنی دناڤ جەرگێ‌ دوژمنی دا ئەنجام د دەت، دچالاكیەكێ‌ دا دكەڤنە دەستێ‌ دوژمنی و ل زیندانا ئەبو غورێب دهێتە زیندانكرن، و پشتی ئازادكرنێ‌ و سەرهلدانا پیرۆز رۆلەكێ‌ كاریگەر دگێریت و تایبەت ل كومەلگەها قەدشێ‌ و ل گەل دروستبوونا پەرلەمان و حوكمەتا هەرێما كوردستانێ‌ دناڤ لەشكرێ‌ تایبەت دا رۆلێ‌ خوە دگێریت نوكە یێ‌ نەخوشە و پەككەفتی یە ل كومەلگەها تەناهی ژیانا خوە دەرباز دكەت.
زیندانیێ‌ سیاسی، مراد محەمەد سالح حسێن، خەلكێ‌ گوندێ‌ دوتازەی سەر ب هۆزا نێروەی یا ڤەیە، ل سالا 1969 ژ دایك بوویە، هەر دو قوناغێن ئێكێ‌ و دوێ‌ سەرەتایی ل گوندێ‌ دوتازە خواندیە، ل سالا 1976 ب زووری ل سەر گوندێ‌ وان دهێنە ڕاكرن و دهێنە ڤەگۆهاستن بۆ كومەلگەها قەدشێ‌ سەر ب قەزا ئامێدیێ‌ ڤە، بەردەوامی دا قوناغێن خواندنا خوە ل گوندێ‌ بێناتە ل دانكا كومەلگەها قەدشێ‌.
زیندانیێ‌ سیاسی، مراد محەمەد سالح حسێن نێروەیی، بەحسێ‌ ژیانا خوە یا شۆڕشگێری دكەت بۆ رۆژنامەیا ئەڤرۆ گۆت: ل سالا 1981 ئەم دناڤ رێزێن پارتی دیموكراتی كوردستان دا هاتینە رێكخستن و ئەم هند بچوویك بووین مە نەدزانی رێكخستن چیە، بەلێ‌ ل سالا 1977 ـ1978 ل سەر دەمێ‌ شۆڕشا گولانێ‌ و دەمێ‌ مەفرەزێن پێشمەرگەی دەركەفتین و ئەم وی دەمی بچوویك بووین ل گوندی بووین و دەمێ‌ دهاتنە گوندی گەلەك مە كەیف پێ‌ دهات و مە خزمەتا پێشمەرگەی دكر و هەمی خەلكێ‌ گوندی و هەر ئێك ل دوڤ شیان و پێ‌ چێ‌ بوونا خوە و دەمێ‌ ئەم هاتینە رێكخستن وی دەمی قوتابی بووم ل قوناغا دووێ‌ ناڤنجی و مە كار ل گەل پێشمەرگەی كر و ب شەڤ دهاتن و مە رێبەری دكر، و رێك نیشادان و ب گشتی هەر كارەكێ‌ ژ مە هاتبا خواستن مە بۆ پێشمەرگەی دكر.
زیندانیێ‌ سیاسی، مراد محەمەد سالح حسێن، گوتژی: گوندێ‌ دوتازە گوندەكێ‌ بناڤو دەنگە دناڤ هوزا نێروەیا دا دهێتە نیاسین ب گوندێ‌ شەهیدان و هەتا 70 شەهیدان مە هەنە و پێشتر ژی بابێ‌ من پێشمەرگەیێ‌ شۆڕشا مەزنا ئیلونێ‌ بوو، و گوندێ‌ مە هەر هەمی پێشمەرگە بوون ل هەر دو شۆڕشان.
هەمان پێشمەرگەی ئەو ژی گۆت: هەستا نەتەوە یا مە دزڤریت بۆ زارۆكینی یا مە و بەری ئەم بهێنە رێكخستن دناڤ رێزێن پارتی دیموكراتی كوردستان دا و دەمێ‌ مە پێشمەرگە دیتین هاتین گەلەك مورالا مە بلند بوو، و كەیف بوومە دروست بوو و مە هەست ب بەرپرسایەتیێ‌ و مەزلومیا مللەتێ‌ كورد كر و دەمێ‌ ئەم هاتینە رێكخستن گەلەك كەیفا مە هات و مە دەست هاڤێتێ‌ كار ل گەل پێشمەرگەی كر، گەلەك جاران پێشمەرگە دهاتە ئاقارێ‌ شیڤێ‌ و مە بۆ خارن بر و هەر تشەكێ‌ پێشمەرگەی داخاز كربا مە بۆ دابین دكر، گەلەك جاران گلوپێن ستینێن كارەبێ‌ مە شكاندن دا ب شەڤێ‌ رووناهیێ‌ نەدەن و پێشەرگە ب سلامەتی بشێت هاتن و چوونێ‌ بكەت، وەك پێشتر مە ئاماژە پێكری هر داخازیەكا پێشمەرگەی كربا مە بۆ جێبەجێ‌ دكر، وی دەمی خێزانێن مەژی ئاگەه ژ مە هەبوو بەلێ‌ دبێ‌ دەنگ بوون و ئەو ژی پشتەڤانێ‌ كارو خزمەتا مە بوون، ل گەل پێشمەرگەیێ‌ كوردستانێ‌، وی دەمی حوكمەتا بەعس گەلەك یا دژوار بوو، كەسەكێ‌ كەس نەدنیاسی و بتنێ‌ ئەز و كورخالەتێ‌ خوە ل گەل ئێك بووین، وی دەمی چێ‌ نەدبوو گەلەكا ئێك و دو نیاسی با چونكە وی دەمی ئەگەر ئێك هاتبا ئاشكراكرن دا، دا هەڤالێن خوە نەنیاسیت و ئەڤە ل سەر دەمێ‌ شۆڕشا گولانێ‌ یا روون و ئاشكرابوو، بەلێ‌ من و كورخالەتێ‌ خوە ئێك دو نیاسی و ئەم بەردەاوم ل گەل ئێك و دو دا بووین، وی دەمی گەلەك یا بترس بوو و كەسەكێ‌ باوەری ب كەسەكێ‌ نەدهات و كەسەكێ‌ نەدشیا خوە ئاشكرا بكەت، بەلێ‌ هەمان دەم مە تاخفت چونكە وی دەمی ئەم قوتابی بووین، و هەمی گاڤا لەشكر و بەرپرسێن حزبیێن حوكمەتا بەعس دیفچوون ل سەر مەدكر.
زیندانیێ‌ سیاسی، مراد محەمەد سالح حسێن گۆتژی: ماوێ‌ رێكخستنا من دا دو جاران من بەلاڤووك بەلاڤەكرینە ئەو ژی ژ گوندێ‌ بێناتە بۆ قەدشێ‌ و گەلەك یا سرۆشتی و ب ساناهی بوو ل دەف مە چونكە دناڤبەرا گوندی و قەدشێ‌ تشتەكێ‌ گەلەك نەبوو بهێتە ئاشكراكرن، و راستە حوكمەت لایێ‌ مە هەبوو بەلێ‌ بهێت مە دەستەسەر بكەت، و پشكنین بكەت ئەڤە نەبوو و گەلەك جاران دا بەلاڤووكا كەینە دجانتێن خوە دا و ئێنە ناڤ قەدشێ‌ و جهێن ب مەترسی نەبوون، و زێدەتر ئەم ل ناڤ گوندی بووین و گەلەك جاران ئەڤ تشتە ل قوتابخانان هەبووینە، هەمی مامۆستایێن مە كورد پەروەر بوون بەلێ‌ وی دەمی یا بترس بوو و خەلكی ل خوە دیارنە دكر، و گەلەك یا بترس بوو و ئەگەر مە كارەك كربا رەنگە مامۆستایین مە خوە تورە كربا سەرا وێ‌ رەفتارێ‌ و مامۆستا نەدوێریان خوە دیاربكەن، و هەمان دەم د دلێن خوە دا پشتەڤانێن هەر بزاڤەكا شۆڕشگێری و رێكخستنێ‌ بوون، ئەگەر نموونەكێ‌ بێژم جارەكێ‌ هێزەك هات چوو دەڤەرا بەرێ‌ گارێ‌ وی دەمی هێزا پێشمەرگەی یا كێم بوو و دەنگۆباس گەهشتنە مە ئەڤێن رێكخستی كو دێ‌ هێزەك چیتە دەڤەرا بەرێ‌ گارێ‌ و پێشمەرگە كێم بوون و ئەم ل قوتابخانێ‌ بووین و هەمان دەم بەرپرسێن رێكخستنێن مە گۆت دڤێت خوە پیشاندانەكێ‌ بكە ندا حوكمەت ب هەوە ڤە مژوول بیت دا هێز بۆ پێشمەرگەی دەرباز بیتە دەڤەرا بەرێ‌ گارەێ‌ و مە دەرگەهێ‌ قوتابخانێ‌ گرت و گەلەك بۆ قەرەبالغ و مە مامۆستایەك هەبوو بناڤێ‌ رەمەزان خودێ‌ ژێ‌ رازی بیت گۆت خولیسەرو ئەڤە هزار جارا تو گرتی باوەر بكە دێ‌ تە سێدارەدەن و ئەم هاتینە سەر جادێ‌ و ژن و زارۆكێن گوندی ژی هاتن و ئەم هەمی هاتینە سەر جادێ‌ و حوكمەت گەهشتە ناڤ خوپیشاندانێ‌ و ئەم ئەڤێن دیار وبەرچاڤ هەر زووی مە خوە قورتال كر، هەتا وی دەمی مامۆستا هاشم نێروەیی بریندار بوو و پشتی حوكمەت ب مە ڤە مژوویلی بووی هێزەكا پێشمەرگەی د هەمزیكێ‌ ڕا چوو دەڤەرا بەرێ‌ گارەی و ئەم هەتا ڕادەكی ئارام بووین و كارێ‌ بڤی رەنگی دهاتنەكرن.

کۆمێنتا تە