جەماوەرێ دهۆكێ و گازیێن هاندانێ
ئەحمەد عارف ئامێدی
وەرزش ب رەنگەكێ گشتی و فوتبۆل ب تایبەتی ل جیهانێ ژ پتریا یاریێن مللینە كو باندۆرا خۆ ب سەر جەماوەری هەیە، هەتا وی رادەی كو ژ سنوورێن خۆ یێن تەرفیهێ و خۆشیێ تێپەرییە و بوویە بازاڕەكی مەزن یێ جڤاكی و ئابۆری و سیاسی، بوویە هێزەكا نەرم و نازك بۆ پشتەڤانیكرن د وەشاندنا رەوشەنبیریێ دا و خورتكرنا گیانێ ناسنامەیا گەلان ل سەرانسەری جیهانی، ژبەر هندڵا باندۆرەكا راستەوخۆ و كاریگەر هەیە و ب مەزاختیەكا كێمتر ب بەراوردی ل گەل چەندین دەسپێشخەریێن دیتر د ڤی بیاڤی دا.
خۆیایە كو جەماوەرێ تەپانێ ل دهۆكێ و تایبەت یێ كو گەهشتیە ژیێ پێنچ سالی، دۆخەكێ سەیرە و بێوێنەیە، ژ بەر حەز و ئیشقا مەزنا هەمی كۆڕێن دهۆكێ ژ گەنج و زارۆ و ژن و پیران ل پارێزگەها دهۆكێ، گەهشتیە وی رادەی كو ئێدی تەنانەت دایكێن ل سەر 50 سالیێ دا دبینین یێن هاندانا یانەیا دهۆكێ دكەن.
ل ڤێرە ب پیرۆزباهی ڤە سەركەفتنا یانەیا دهۆكی ب جاما قارەمانییا ئیراقێ كو بۆ جارا ئێكێ یە د دیرۆكێ دا دهێتە رویدان، هەروەسا ژی بەرییا هینگی ب چەند هەیڤەكێن كێم، جاما یانەیێن كەنداڤی بدەستڤە ئینابوو. ب ڤێ چەندێ فوتبۆل ل دهۆكێ بوویە دیاردەكا پێشكەفتی یا بێ هەڤڕك رۆژ بۆ رۆژ گەشە دكەت. باشترین گرۆڤە ژی بەرهەڤبوونا هاندەران ب پیر و گەنج ڤە قەستا سەر مدەرجێن ستادیۆمێ دكەن، هەروەكو شەهیانەكا وەرزشی یە، ئەڤە ژی بوویە دۆخەكێ جڤاكی یێ كێموێنە ل ڤان سالان، مە ل ڤێ یاریا داویێ یا د ناڤبەرا دهۆك و زاخۆ دا ژی دیت؛ هەروەكو سەرهلدانەكا فوتبۆلێ، هەمی باژارێن ب هەڤرا تەماشەی ڤێ بوویەرێ دكر، چو ب چوونا یاریگەهێ یانژی ل بەر شاشەێن تلفزیۆنێن خۆ ل مال یانژی ل جهێن گشتی. وەرزشا هەرێمێ و ب تایبەت ژی فوتبۆل یا بوویە باهۆزەكا مەزن، كو ئێدی چو یاریگەه تێرا ڤی جەماوەرێ شێـت و ئاشقێ تەپێ ناكەن، ل ڤێرە ژی ئەم داخوازیەكا ژ دل ژ لایەنێن پەیوەندیدار دكەین كو بۆ ئاڤاكرنا یاریگەهەكا سەردەم و نێڤدەولی و ب سالۆخەتێن جیهانی و گونجای وەكو خەلاتكرنەك بۆ ڤی جەماوەێ هەژی هەر خەلاتەكی كو تێرا پتری 50 هزار هاندەران بكەت، كو ببیتە میناكەكا شارستانی یا پێشكەفتی ل نیڤا دهۆكێ كو خزمەتا وەرزشێ و تەپا دهۆكێ بكەت و بۆ سالێن داهاتی، چونكو جەماوەرێ دهۆك جەماوەرەكێ شارستانی و رەوشەنبیر و تێگەهشتی یەو هەژی هەر خزمەتكێ یە، دبێژمە یانەیا دهۆكێ كو بەژنا خۆ بۆ ڤی جەماوەرێ دلسۆز بچەمینیت كو ب هەمی هێز و شیانێن خۆ هاریكاریا یانەیا خۆ دكەن و مۆرالەكا ب لڤین ددەتە یاریزانان سەرەرای هەبوونا هندەك خێزانان كو شیڤەكا خورانێ ژی نینە، لێ ب زكێ برسی دهێتە یاریگەهێ و هاندانا یانەیا خۆ دكەت.
