حوكمه‌تا هه‌رێمێ و به‌رنامێ چاكسازیێ !!!
حوكمه‌تا هه‌رێمێ ئه‌ڤه ماوه‌كێ درێژه د كاودانێن به‌رته‌نگدا ده‌رباز دبیت و زۆر قه‌یرانان خوه سه‌پاندیه ل سه‌ر بارودوَخێ هه‌رێمێ، بگره ژ قه‌یرانا داریی و شه‌رێ داعش و قه‌یرانا سیاسی دگه‌ل لایه‌نێن كوردی ژ لایه‌كی و دگه‌ل به‌غدا ژ لایه‌كێ دی زێده‌باری قه‌یرانا كاره‌بێ و خزمه‌تگوزاریا و چه‌ندین كێشێن دی به‌لێ ئه‌ڤ هه‌موو كێش و قه‌یرانه بوَ نه‌بوونا سیسته‌مه‌كێ ئیداری یێ رێك و پێك دزڤریت؛ كو باراپتر یادام و ده‌زگایێن میری یێن هه‌رێمێ كوپیێت به‌غدا نه و یاخوَیایه كو به‌غدا د هیچ بواره‌كی دا پێشنه‌كه‌تیه و سه‌ركه‌فتن د هیچ پروَژه و كاره‌كی دا نه ئینایه!
له‌ورا زۆرا فه‌ره حوكمه‌ت بیر ل چاكسازیا دام ده‌زگایێن خوه بكه‌ت نه‌ك بتنێ یا رێكخستنا دارایی و كێمكرنا خه‌رجیا و زیادكرنا داهاتی چنكو ئه‌گه‌ر دام و ده‌زگایێن میری نه ئێنه رێكخستن و هنده‌ك ژ وان نه ئێنه هه‌لوه‌شاندن و و رێژا وان و یاوه‌زاره‌تا نه ئێته كێمكرن و زۆریا جڤاتا د ئێك پارێزگه‌هدا نه ئێته راستڤه‌كرن و ببیته ئێك جڤات و سیسته‌مێ دامه‌زراندنێ نه ئێته گوهوَڕین و ل دووف پێدڤیا حكومه‌تێ و تایبه‌تمه‌ندیا نه نبیت و چه‌ندین یاسا نه ئێنه راستڤه‌كرن و گوهوَڕین و دادگه‌هێن ئیداری و بازرگانی نه ئێنه دانان و خوَرتكرن و سنووره‌ك بوَ ده‌ستهه‌لاتا و لوَبیێن بازرگانی نه ئێته دانان ئه‌ف قه‌یرانێن هه‌ین دێ هه‌ر مینن و دێ قوَلتر لێ هێن!!
هه‌ر چه‌نده رێگر و ئاسته‌نگ گه‌له‌ك دزۆرن ل به‌رسینگێ حوكمه‌تێ بوَ ده‌سپێكرنا به‌رنامێ چاكسازیێ و یا ژ هه‌موویێ گرنكتر ململانێیا حزبیه به‌لێ دڤێت حوكمه‌ت ژیرانه بیر بكه‌ت و بریارا بده‌ت و یاژ هه‌موویێ گرنكتر دام و ده‌زگایێن حكومی ژ یێن حزبی بهێنه جوداكرن و كه‌رتێ تایبه‌ت ببیته شریكێ راسته‌قینه یێ حوكمه‌تێ و چه‌ندین كه‌رتێن گرنگ وه‌كی كاره‌بێ و ئاڤێ و ساخه‌له‌میێ و چاندنێ و پیشه‌سازی و خاندنا بلند و گه‌شت و گوزار و چه‌ندین خزمه‌تگوزاریێن دی كه‌رتێ تایبه‌ت برێڤه ببه‌ت بهه‌ماهه‌نگی دگه‌ل حوكمه‌تێ و ل دووف به‌رنامه و چاڤدێریا حوكمه‌تێ بن ئه‌ڤه ئه‌گه‌ر حوكمه‌تێ پلانا وێ ئه‌و بیت بنیاته‌كێ ئیداری و ئابووری یێ موكم دانیت!!
سیسته‌مێ بانكی ئێك ژ گرنكترین سه‌كته‌رانه كو فه‌ره حوكمه‌ت كار ل سه‌ر بكه‌ت و پێشبێخیت و ئه‌ڤ سه‌كتره ژبن روَتینا حوكمه‌تێ ده‌ركه‌ڤیت چنكو بانكێن حكومی بتنێ بووینه صندوق و چ كار و چالاكیێن دی ین بانكی ناكه‌ن و كه‌رتێ تایبه‌ت روَلێ سه‌ره‌كی ببینیت د ڤی بواری دا و بڤی ره‌نگی دێ ئابوورا هه‌رێمێ پێشكه‌فتنه‌كا مه‌زن ب خوه‌ڤه بینیت.
هه‌موو پێشبینی بوَ وێ چه‌ندێ دچن كو سالا 2016 د ساله‌كا چاره‌نوساز بیت بوَ هه‌رێما كوردستانێ ژ هه‌موو لاڤه، بگره ژ لایێ سیاسیڤه تا ئابووری و نافخوَیی و ده‌ركی و په‌یوه‌ندیا له‌وا پلانا حوكمه‌تێ بوَ سالا 2016 كو ناڤێ وێ كریه سالا چاكسازیا هاتیه دانان داكو دگه‌ل كاودانان خوه بگونجینن هه‌ر چه‌نده ئه‌ڤ پلانه زۆرا دره‌نگه به‌لێ ڤێرا گه‌هشتن بوَ كرنا چاكسازیا باشتر كو نه هێنه كرن و ببیته ئه‌گه‌ر ئه‌ڤ ده‌لیڤا زێرینا هاتیه پێش بوَ كوردان ژ ده‌ست بچیت ژ ئه‌گه‌رێ ڤان كێشه و قه‌یرانا كو رێ بوَ دوژمنا خوشكریه پیلان ل دووڤ پیلانێ دژی كوردان دارێژن و جێبه جێكه‌ن!!
حوكمه‌تا هه‌رێمێ ل ده‌سپێكێ دێ توشی چه‌ندین گرفتا بیت به‌لێ گه‌له‌كا فه‌ره حوكمه‌ت پشته‌ڤانیا به‌هره‌مه‌ندا بكه‌ت و كه‌سێن خوَدان شیا ن داكو ببنه هاریكار و ژێرخانه‌كا ئابووری و ئیداری یا بهێز بوَ كوردستانێ دانن و بوَ ڤێ چه‌ندێ كوَمپانیا قایل بكه‌ت كو هه‌ر سال ب سپوَنسه‌ری پشته‌ڤانی ل ڤی به‌رنامه‌یی بهێته كرن و هه‌رێما كوردستانێ و خه‌لكێ وێ ژ قوَناغا به‌كاربه‌ر و مشه‌خوَر ڤه‌گوهێزنه قوَناغا به‌رهه‌م ئینانێ و بگه‌هیته ئاستێ دابینكرنا پێدڤیێن ناڤخوه و ل دووڤ دا قوَناغا هاورده‌كرنێ ده‌ست پێبكه‌ت كو نوكه ئه‌ڤ پلانه ژ هه‌مووا گرنكتره حوكمه‌ت ده‌ست پێبكه‌ت !!
كاودانێن هه‌رێما كوردستانێ تێدا دبووریت زۆر دمه‌ترسیدارن له‌ورا فه‌ره خه‌لكێ هه‌رێمێ دهاریكاربن و پشته‌ڤان بن بوَ پروسێسا چاكسازیێ و نه‌بنه رێگر و ئه‌گه‌ر بوَ خوَلقاندنا قه‌یرانێن نوی، چنكو چاره‌نڤیسێ مه هه‌مووا ئێكه یا دڤێت بهێن فره‌ه بین و هاریكاربین دا ڤان قوَناغا ده‌رباز كه‌ین یان دێ بینه ئه‌گه‌را هه‌موو تشتا ژ ده‌ست بده‌ین !!
