حوكمه‌ت دێ پلانا ستراتیژی بۆ هشكه‌سالیێ دانیت
هه‌ولێر، قائید میرۆ:
به‌رپرسه‌كێ وه‌زاره‌تا چاندنێ ئاشكرا كر، حوكمه‌تا هه‌رێما كوردستانێ ب پلانه‌كا ستراتیژی دێ به‌رهنگاری كاریگه‌ریێن هشكه‌سالیێ بیت و دبێژیت: راپۆرته‌ك ل دۆر كاریگه‌ری و زیانێن هشكه‌سالیێ بۆ سه‌رۆكایه‌تیا جڤاتا وه‌زیران هاتیه بلندكرن.
كه‌ریم سلێمان، بریكارێ وه‌زاره‌تا چاندنێ بۆ رۆژناما ئه‌ڤرۆ دیار كر، پێداچوون بۆ ره‌وشا هشكه‌سالیێ ژ لایێ وه‌زاره‌تا چاندنێ ڤه هاتیه كرن و راپۆرته‌ك ژ لایێ وه‌زاره‌تا چاندنێ ڤه بۆ سه‌رۆكایه‌تیا جڤاتا وه‌زیران هاتیه بلندكرن و گۆت: “تێدا ب هووری به‌حسێ كاریگه‌ریێن هشكه‌سالیێ هاتیه كرن، ژ لایێ پلانا بله‌ز بۆ به‌رهنگاربوونا هشكه‌سالیێ و ژ لایێ پلانا داهاتی ڤه بۆ كێمكرنا زیانێن هشكه‌سالیێ، هه‌تا مه داخواز یا كری جۆتیار ژی بهێنه قه‌ره‌بووكرن یێن ب ئه‌گه‌رێ هشكه‌سالیێ زیاندار دبن”.
كه‌ریم سلێمان گۆتژی: “گوهۆڕین كه‌فتینه سه‌قای ب شێوه‌یه‌كێ گشتی، له‌وڕا مه دڤێت ب پلانه‌كا ستراتیژی كار بۆ به‌رهنگاریا هشكه‌سالیێ بكه‌ین، ئێك ژ وان وه‌لاتێن كه‌فتیه بن كاریگه‌ریێن گوهۆڕینا سه‌قای ئیراق و هه‌رێما كوردستانێیه، له‌وڕا حوكمه‌تا هه‌رێما كوردستانێ نوكه یا كار بۆ به‌رهنگاربوونا هشكه‌سالیێ و ڤه‌دیتناچاره‌سه‌ریان دكه‌ت”.
