حوکمەتا عیراقێ رێگرە ل ھەمبەر زڤرینا ئاوارێن مەسیحی
ئەڤرۆ نیوز، رەمەزان ھەرنی:
ئەندامەکا پەرلەمانێ کوردستانێ ژ پێکھاتا مەسیحیان دیار کر کو پشتی دەشتا نەینەوا ب تەمامی ژ چەکدارێن داعش ھاتیە پاقژکرن ب رێژەکا باش ئاوارێن مەسیحی زڤرینە سەر گوند و جھێن خوە ل دەڤەرێ، بەلێ ھەتا نوکە چو خزمەتگوزاریەک نەگەھشتیە وان و ژیانەکا نەخوەش و خراب دەرباز دکەن.
روبینا عەزیز، ئەنداما پەرلەمانێ کوردستانێ ژ پێکھاتا مەسیحیان بۆ ئەڤرۆ نیوز دیار کر کو حوکمەتا عیراقێ پشتا خوەدایە ئاوارێن زڤرینە ڤە و ھەتا نوکە ئاڤ و کارەب و رێ و بان بۆ وان نەھاتینە نووژەنکرن و گەلەک جھان ژی ھەتا نوکە ھێشتا خانیێن مینکری لێ ماینە و مەترسیا پەقینان ھەیە و حوکمەتا عیراقێ ژی پشتا خوەدایە ئاوارێن د ناڤ کەمپێن ھەرێما کوردستانێ دا یێن کو زڤرینە سەر جە و مالێن خوە ل دەشتا نەینەوا.
ناڤھاتی خویا کر کو ھەتا نوکە چو خزمەتگوزاری بۆ وان نەھاتینە دابینکرن، ژبلی ھەبوونا حەشدا شەعبی و رەفتارێن وان یێن نەخوەش ل گەل وان کەسێن ژ ئاوارەیێ زڤرینەڤە.
