حەزا پێشمەرگەی گەلەك بوو و هەمی بزاڤ و كار و خەباتا وی بۆ خزمەتكرنا ئاخ و ملەتێ كورد بوو
سالار محەمەد دۆسكی:
1-6
ئێك ژ پێشمەرگەیێن هەر دو شۆڕشێن ئیلۆن و گولانێ و پشكدارێ شەڕێ داعش بەحسێ ژیانا خوە یا پێشمەرگایەتیێ ل قوناغێن خەباتێ دكەت، دیار دكەت كو ڤی مللەتی گەلەك ماندیبوون و زەحمەت و شەهید و قوربانی بۆ ئەڤێ ئاخێ داینە هەتا گەهشتیە ڤێ قوناغێ، هەمی هیڤی و ئومێدێن وی ئەو بووینە كو جارەكا دی ناڤ مالا كوردی ئێكرێز تێدا پەیدا ببیت، و زێدەتر خزمەتا گەل و وەلاتی بهێتەكرن، و كار بۆ ئاڤاكرنا كابینا نووی یا حوكمەتا هەرێ ما كورستانێ بهێتە كرن.
پێشمەرگەیێ هەر دو شۆڕشێن ئیلۆن و گولانا پێشكەفتنخواز، قادر حەكیم شوكری تیلەری، ل سالا 1957ێ ژ دایك بوویە، ژ بەر رەوش و كاودانێن دەڤەر تێدا دەرباز بووی نەچوویە چ قوتابخانێن فەرمی، بەلێ شیایە دناڤ شۆڕشێ دا خوە فێری خواندن و نڤێسینێ بكەت.
قادر حەكیم شوكری، زێدەتر بۆ رۆژنامەیا ئەڤرۆ گۆت: ل سەر دەمێ شۆڕشا مەزنا ئیلۆنێ گوندێ مە ل دەڤەرا بەرواری ژووری یا بوو، و دەمێ مە فام ژ دونیایێ كری ئەم دناڤ شۆڕشێ دا مەزن بووینە، و مە بەردەوام هاتن و چوونا پێشمەرگەی و چەك و رەختێن ملێن وان دیتن و مە زانی ئەڤە پێشمەرگەنە و بەرەڤانیێ ژ ئاخ و كەرامەتا مللەتێ كورد دكەن، وی دەمی بابێ من موختارێ گوندی بوو و بەرپرسێ شانەكا حزبی بوو، ل دەڤەرێ و كارێ وان ئەو بوو داهات دهاتە پیڤان و 10% بۆ حزبیێ دهاتنە هنارتن، مامێ من پێشمەرگە بوو و هەتا پشتی نسكۆیا سالا 1975 كارتێكرن ل سەر من هەبوو، كو ئەز ژی ببمە پێشمەرگە و هاریكاریا من گەلەك كر و چەند جاران من بزاڤكر ببمە پێشمەرگە بەلێ ژیێ من گەلەكێ بچوویك بوو نەدهاتمە وەرگرتن، و هاتمە دەڤ (سەلیم ئەسعەد خوشەڤی) ل بامەرنێ سالا 1974ێ ل گوندێ زێوێ وەك پێشتر من ئاماژە پێكری چەند جاران من سەرەدان بۆ دكر، گۆت تو هێشتا یێ بچوویكی، و وی دەمی خودێ ژێ رازی (رەمەزان رەشو) ئامر سری بوو، و من ل گەل خوە بر و من گۆتێ هاریكاریا من بكە دا بهێمە وەرگرتن، وەك پێشمەرگە و ئەم هاتین پێكڤە چووینە دەف (سەلیمی) و ئەز وەرگرتم وەك پێشمەرگە و ناڤێ من نڤێسی و بلندكر، و پشتی بورینا هەیڤەكێ رازیبوون ل سەر وەرگرتنا من هات، و ئەز بوومە پێشمەرگە و چەكێ شەرەفێ من هەلگرت.
هەمان پێشمەرگەی، قادر حەكیم شوكری تیلەری، گۆت: پشتی هاتیمە وەرگرتن پێشمەرگە ل سالا 1974 ل دووڤ رێنمایێن سەركردایەتیێ مە دەست ب هەلگرتنا چەكی كر، و هەمی رێنمایێن شۆڕشێ مە بجهئینان و بەردەوام بووین هەتا سالا 1975ێ دەمێ نسكۆیا خیانەتكاری دروست بووی، 6/3/1975 نسكۆ دروست بوو، بەلێ 18/3/1975 مە خوە ڤەكێشا و چەپەرێن شەری هاتنە بەردان، و ئەم چووینە ناڤ بەروارییا چونكە مالێن مە ل وێرێ بوون، وی دەمی زگورد بووم و هەیڤك دو هەیڤ دەبازنبەوون و مە بەرهەڤیێن خوە دكرن و ئەم بەرەف وەلاتێ ئیرانێ چووین، و مە ژیانا ئاوارەیێ دەستپێكر و گەلەك خێزان ژی ل گەل مە بوون، و ئەم ل وەلاتێ توركیا بەرەف وەلاتێ ئیرانێ چووین، ژوان كەسێن ل گەل مە، خەلیل محەمەد تەمەر، عبدولخالق بوو، بابێ عەلی حسێن بوو، زوبێر، ئەم دەسپێكێ چووینە ئوردیگایێ زێوە وی دەمی كوردێن ئیراقێ ل وێرێ بوون، و چەند هەیڤان ل وێ دەڤەرێ ئاكنجیبووین وی دەمی حوكمەتا شاهی بوو و فەرمان دا ئەف كوردە بهێنە بەلاڤەكرن، و دەست ب بەلاڤەكرنا كوردێن ئیراقێ كر، ل سەر باژێرێن جودا جودا ل ئیرانێ ب وێ مەرەمێ بوویە دا چ لڤینێن سیاسی دروست نەبن، و ئەز هاتمە ڕەوانەكرن بۆ باژێرێ(بەندەر بۆ شەهر) عەردێ نوە جهێ نەوەیێن ئیرانێ لێ و ئەم كومەكا هڤالان وی باژێری نشتەجێبووین و ئەم دو سالان ماینە ل وێرێ و هەر دەم مە بزاڤكرن بهێنە ناڤ شۆڕشێ و بهێین و رێك نەبوو، و دیسا كاودانێن وی دەمی ژی گەلەك بەرتەنگ بوون، و نەدهاریكار بوون، و ئیرانێ گەلەك رێگری ل مە دكر، و نەدهێلا دەركەڤین ژ وی باژێری، بەلێ جارەكێ ئەز و هەڤالەكێ خوە هاتینە كەرج و حەمید بەرواری مرۆڤێ مە بوو و یێ نیاس بوو، و هاریكاریا مە دكر خودێ ژێ رازی بیت بەری چەند سالان چوویە بەر دلوڤانیا خودێ، وی ل دەف ئدریس بارزانی خودێ ژ هەردوكا رازی بیت، ب رێكێن نەقانوونی و رێك بوومە ڤەكر و هاریكار و پشتەڤانیا مەدكر و ب رێكێن جودا ئەم هاتینە كوردستانێ، وی سەردەمی سەركردایەتیا بەروەخت بوو، ئانكو (قیادە موئەقت) بوو وەك پێشتر مە ئاماژە پێكری ئەم هاتینە كوردستانێ سالا 1977ێ بوو و ئەم دو سالان ماینە دناڤ شۆڕشێ هەتا سالا 1979 دەمێ بارزانی چوویە بەر دلوڤانیا خودێ، و ئەم ماینە ل دەڤەرێ هەتا كونگرە نەهێ هاتیە ئەنجامدان، دووبارە ئەم زڤرینە كوردستانێ و فەرمان دا بچینە دەڤەرێ و هەر ئێك ژ مە 100 دینار ژی وەك هاریكاری وەرگرتن، وی دەمی ئەڤ كوژمێ پارەی گەلەك بوو و ئەم هاتینە رەوانەكرن بۆ دەڤەرێ، وی دەمی شنی لق هاتبوونە دانان چونكە پێشتر سەركردایەتی یا بەروەخت بوو و لقێن پارتی شنی هاتە دەڤەرێ، وی دەمی بەرپرسێ لقێ خودێ ژێ رازی د. جەجیس بوو، و دووڤدا كارگێر و ئەندامێن لقێ هاتنە دەست نیشانكرن، و دووڤدا لژنێن محلی ل سنورێ قەزا هاتنە دروستكرن، و دووڤدا كار بۆ دروستكرنا رێكخراوا هاتەكرن و ئەو ژی هاتنە دروستكرن، ئێكەم رێكخرا ل ئامێدیێ هاتیە دروستكرن رێكخراوا شەهید عەلی عوبیدوللا بوو، و من دناڤ وێ رێكخراوێ دا دەست ب خەباتا خوە یا شۆرشگێری ل شۆرشا گولانێ دەستپێكر، وی دەمی بەرپرسێ هێلەكا سەرەكی یا رێكخستنێ بووم، و مامە ل گەل وێ رێكخراوێ هەتا دووماهیێ ناڤێ وێ هاتیە گوهۆرین بۆ رێكخراوا پیرس، من بەردەوامی دا خەباتا خوە هەتا هەوا ئەنفالێن رەش ل سالا 1988ێ و ئەم بەرەڤ وەلاتێ توركیا چووین، هەر ئەز ل گەل وێ رێكخراوێ مام یا سەر ب لژنا ناوچا ئامێدیێ یا پارتی دیموكراتی كوردستان ڤە بوو.
