حەز دكەت سترانەكێ ب كرمانجی بێژیت
هەرهین محەمەد:
سترانبێژ و مۆزیكژەن (شوان قەرەداغی) د دیدارەكێ دا بۆ رۆژناما ئەڤرۆ گۆت: بەری چەندەكێ من كلیپەك بەلاڤكر ب ناڤێ (ئارامی جان) نوكە ژی مژولی سترانەكا نوو مە و لنێزیك دێ هێتە كلیپكرن.
ناڤبری گۆت: دێ گەلەك كەیفخۆش بم هەكە سترانەكێ ب زاراڤێ كرمانجی بێژم و ب ئانەهیا خودێ ئەڤ كارە د بەرنامێ من دایە بكەم و بەری نوكە ژی د بەرنامێ من دابۆ ئەز و خویشكا خۆ دلنیا قەرەداغی سترانەكێ ل گەلك چێكەین، بەلێ هەر ئێك ژمە مژوولی ژیانا خوە یا تایبەتە و ئەم ژێك دوورین و هەتا نوكە نەشیاین ئەوی كاری بكەین، بەلی َهیڤیدارم رۆژەك بهێت و ئەڤی كاری ئەنجام بدەین و ل سالا 1995 من دەست ب كارێ هونەری كریە و هەتا نوكە ژی بۆ چ كارێن خوە نەیێ پەشێمانم، چونكو كارێن من دكێمن و ئەزژ هەمی كارێن خوە یێ رازی مە و گەلەك سترانبێژ مە هەنە بووینە قوتابخانە بۆ سترانبێژێن نووخاز وەكو محەمەد عارفێ جزیری و تەحسین تاها و محەمەد شێخو و ئەز گەلەك شانازیێ ب ئەڤان دبەم و بۆ من مامۆستاێن مەزنن و ژێدەرێن ئاوازو سترانێن جوانن بۆ مە ل شوینا خوە هێلاین و ژبەر هندێ گەلەك گوهداریا دەنگێ وان دكەم و مفای ژێ دبینم.