خه‌لاتێ باشترین ده‌رهێنه‌ر ل فیسته‌ڤالا شانۆیا سه‌رجادێ وه‌رگرت
دهۆك، زنار تۆڤی:
ده‌رهێنه‌ر هه‌لكه‌ت ئدریس عابد، د دیداره‌كێ د ا بۆ رۆژناما ئه‌ڤرۆ گۆت: ل فیسته‌ڤالا شانۆیا سه‌رجادێ یا (سۆران – ره‌واندۆز) ئه‌م شییاین ب شانۆگه‌ریا (كی دێ مریت؟) كو ژ به‌رهه‌مێ رێڤه‌به‌ریا گشتی یا ره‌وشه‌نبیری و هونه‌ری دهۆك/رێڤه‌به‌ریا هونه‌رێ شانۆیێ یه، خه‌لاتێ باشترین ده‌رهێنه‌ر وه‌ربگرین، ئه‌ڤ شانۆگه‌ریه ژ ئاماده‌كرن و ده‌رهێنانا من ب خوه یه، هه‌ردو ئه‌كته‌رێن خودان شیان ( فه‌رسه‌ت عزه‌ت و سیروان گۆیی) پشكداری تێدا كرینه، رێڤه‌به‌رێ به‌رهه‌می ژی هه‌رمان هاشم بوو.
ناڤهاتی گۆت: بۆ ده‌مێ بیست رۆژان مه كار د ڤێ شانۆگه‌ریێ دا كریه، چیرۆكا ڤێ شانۆگه‌ریێ ل سه‌ر دو كه‌سان بوویه، ئێك ژ وان كه‌سه‌كێ دانعه‌مره و یێ دی گه‌نجه، ئه‌م نوزانین كی ژ وان دمریت، هه‌ر چه‌نده ئه‌و كه‌سێ دانعه‌مر یێ نه‌خۆشه، لێ ئه‌و كه‌سێ گه‌نج به‌ری وی وه‌غه‌ر دكه‌ت، ب گشتی ئه‌ڤ شانۆگه‌ریه ل سه‌ر پرسێن مرنێ یه، د ڤێ شانۆگه‌ریێ دا مه خه‌لاتێ باشترین ده‌رهێنان وه‌رگرت و ئه‌م ڤی خه‌لاتی پێشكێشی گیانێ هه‌ڤالێ خوه هه‌كار عه‌بدولقادر باجلۆری دكه‌ین.
