خوارنێن خەملاندی
رێژین حكمەت
د جیهانا ئەڤرۆ دا، كو تەكنەلۆژیا و سۆشیال مەدیا هەموو سنوور شكاندینە، دیاردەكا دلتەزین سەرهلدایە، پێشبركێ د نیشاندانا نیعمەتاندا. گەلەك ژ مە، ب بێ ئاگاهی یان بۆ خۆنیشادانێ، وێنەیێن خوارنێن جۆرا وجۆر و خەملاندی بەلاڤ دكەین، بێی كو هزر د وێ چەندێ دا بكەین كا ئەڤ وێنە دێ چ ل دەروونێ مرۆڤەكێ كێم دەرامەت كەت.
برینا چاڤی و ئیشانا دلێ هەژاری راستی ئەوە، خوارن بتنێ تێركرنا زكی نینە، بەلكو دابینكرنا هێزێ یە بۆ بەردەوامییا ژیانێ، دەمێ تو خوارنەكا ب كۆمەكا پارە یێن زێدە هاتییە كڕین و ب جوانترین شێوە هاتییە خەملاندن نیشا هەژارەكێ ددەی، تو دو جاران وی دشكێنی، جارەكێ ب برسیا وی، كو نەشێت وەكی تە زكێ خۆ تێر بكەت، جارەكێ ب بێدەسەلاتیا وی، كو نەشێت وەك تە وێ جوانیا خوارنێ بۆ زارۆكێن خۆ دابین بكەت.
خەملاندنا ڕاستەقینە ل كیرێ یە؟ پێدڤی یە ئەم بزانین كو خەملاندنا خوارنێ نە د دانانا گول و تشتێن گرانبەها دایە ل سەر مێزێ، بەلكو خەملاندنا ڕاستەقینە د هندێ دایە كو:
ئەو خوارن ب حەلال و ماندیبوونێ هاتبیتە ب دەستڤەهینان، پشكەك ژ وێ خوارنێ بگەهیتە دەستێ كەسەكێ برسی، سفرەیا مە ب كێمییا كێم بوونا(ئیسرافێ) هاتبیتە خەملاندن.
مەزنی نە د وێ چەندێ دایە تو چ دخۆی، بەلكو د وێ چەندێ دایە تو هەست ب وی كەسی دكەی یێ كو نان بۆ خوارنێ نینە.
بەرەف جڤاكەكێ ب هەستتر
هەكە مە دڤێت جڤاكەكێ ساخلەم ئاڤا بكەین، دڤێت فێری (فلتەرێ مرۆڤایەتیێ) ببین بەری بەلاڤكرنا هەر وێنەیەكێ خوارنێ، بلا ئەڤ پرسیارە ل بەر سینگێ مە بیت: ئەرێ ئەڤ وێنە دێ كەیفێ ددەنە هەژاران؟ یان دێ بیتە ئەگەرێ هندێ كو ئەڤ شەڤە ب دلەكێ شكەستی بنڤن؟ بلا خوارنا مە د ناڤ مالێن مە دا یا پاراستی بیت و دلۆڤانیا مە د جاددەیان دا یا بەلاڤ بیت. چونكو هەژار پێدڤی ب دلۆڤانیا تە یە، نەكو ب دیتنا سفرا تە یا ب رەنگ و دەنگ.