خواست ل سه‌ر كاره‌بێ بوو 700 مێگاواتان زێده بوویه
هه‌ولێر، قائید میرۆ:
چه‌ند رۆژه‌كه ده‌مژمێرێن كاره‌بێ كێمبووینه و په‌یڤدارێ وه‌زاره‌تا كاره‌بێ ژی ئاشكرا كر، دو ئه‌گه‌ر بۆ كێمبوونا ده‌مژمێرێن كاره‌با نیشتمانی هه‌نه و رۆژێن داهاتی دێ كاره‌با زێده‌تر هێته ناڤا تۆڕا گشتی بۆ ئاساییبوونا ره‌وشا كاره‌بێ.
ئومێد ئه‌حمه‌د، په‌یڤدارێ وه‌زاره‌تا كاره‌با حوكمه‌تا هه‌رێما كوردستانێ بۆ رۆژناما ئه‌ڤرۆ دیار كر، ئه‌گه‌رێن كێمبوونا ده‌مژمێرێن كاره‌بێ بۆ هاتنا پێلا سه‌رمایێ و سه‌خبێركرنا هه‌ژماره‌كا ویستگه‌هێن كاره‌بێ ڤه‌دگه‌ڕیت، چونكو وه‌زاره‌تێ ده‌لیڤه دایه ویستگه‌هێن كاره‌بێ ل خه‌بات و هه‌ولێر و سلێمانیێ پڕۆسا سه‌خبێریێ ئه‌نجام بده‌ن، چونكو وه‌رزێ هاڤینێ مه رێ نه‌دایه بهێنه سه‌خبێركرن، دگه‌ل ده‌ستپێكرنا سه‌خبێریێ پێله‌كا سه‌رمایێ هه‌رێما كوردستانێ ڤه‌گرتیه و بوویه ئه‌گه‌ر ده‌مژمێرێن دانا كاره‌با نیشتمانی كێم ببن.
ئومێد ئه‌حمه‌د گۆت: “ژ حه‌فتیا بۆری وه‌ره 600 هه‌تا 700 میگاواتان خواست ل سه‌ر كاره‌با نیشتمانی زێده بوویه و وه‌زاره‌تا كاره‌بێ ویستگه‌هێن سه‌خبێری تێدا دهاته كرن ئاگه‌هداركرینه له‌زێ بكه‌ن بۆ سه‌خبێریێ و ل چه‌ند رۆژێن داهاتی دێ ره‌وشا كاره‌بێ باشتر لێهێت، چونكو ئه‌و یه‌كه‌یێن ل تۆڕا گشتی هاتینه ڤه‌قه‌تاندن دێ جاره‌كا دی ڤه‌گه‌ڕن و كاره‌با زێده دێ هێته ناڤا تۆڕا گشتی و ره‌وشا كاره‌بێ دێ ئاسایی بیته ڤه”.
